Foto: rail-news.kz
«Jolaýshylar tasymaly» AQ poiyzben júk pen bagajdy tasymaldaý erejelerin eske salady. Sapardyń jaily ótýin qamtamasyz etý maqsatynda qol júginiń salmaǵy men ólshemine qatysty qoldanystaǵy normalardy saqtaý talap etiledi. Belgilengen shekterden asqan jaǵdaida artyq júk temirjol vokzaldarynyń bagaj bólimshelerinde resmi tártippen qabyldanyp, tasymaldaýǵa rásimdeledi.
Ýákiletti organnyń buiryǵyna sáikes, jolaýshylar poiyzdarynda qol júgin tegin alyp júrýdiń normalary bekitilgen. Atap aitqanda, «Tulpar-Talgo» vagondarynan quralǵan quramdarda salmaǵy 25 kilogramnan aspaityn jáne úsh ólshemniń qosyndysy 150 santimetrden aspaityn qol júgin tegin alyp júrýge bolady. Qalǵan vagondar úshin bul kórsetkish – 35 kilogrammǵa deiin, al ólshemi úsh jaqtyń qosyndysymen 200 santimetrden aspaýy tiis.
Sonymen qatar, jolaýshylar bólshektelip, qaptalǵan jáne kólemi qol júgin ornalastyrý oryndaryna syiǵan jaǵdaida balalar arbasyn, qylqaiyq jáne motorsyz velosipedti aqysyz alyp óte alady. Múgedektigi bar jolaýshylar jeke paidalanýyna arnalǵan kómekshi tehnikalyq quraldar men arnaiy qozǵalys quraldaryn qosymsha aqysyz alyp júrýge bolady.
Qol júgin jolaýshylar otyratyn oryndarǵa, ótkelderge, dálizderge jáne tambýrlarǵa ornalastyrýǵa qatań tyiym salynady. Belgilengen normadan asqan jaǵdaida artyq qol júk nemese bagaj temirjol vokzaldarynyń bagaj bólimshelerinde resimdelýge tiis.
Bul qyzmet №33/34 «Aqtóbe – Almaty», №41/42 «Almaty – Atyraý», №77/78 «Almaty – Mańǵyshlaq», №691/692 «Aqtóbe – Atyraý», №9/10 «Almaty – Astana»
baǵyttarynda kórsetiledi. Quny stantsiialar arasyndaǵy araqashyqtyqqa qarai esepteledi jáne qoldanystaǵy tarifter men erejelerge sáikes aiqyndalady.
Mysaly, tanymal baǵyttarda jeke jáne zańdy tulǵalar úshin bagaj ben júk-bagajdy tasymaldaý quny (1 kg úshin) tómendegidei belgilengen:
• Almaty – Mańǵystaý: bagaj – 57 teńge, júk-bagaj – 114 teńge;
• Almaty – Astana: bagaj – 39 teńge, júk-bagaj – 94 teńge;
• Shymkent – Almaty: bagaj – 27 teńge, júk-bagaj – 57 teńge
Aita keteiik, jolserikter arqyly júk jiberý zań talaptaryna sáikes kelmeidi jáne ákimshilik jaýapkershilikke, sondai-aq qyzmetkerdiń jumystan bosatylýyna ákep soǵady.
Bagaj jáne júk-bagajdy tasymaldaý qaǵidalary jónindegi tolyq aqparatty 1433 (tegin) nómirine qońyraý shalý arqyly nemese bilet.railways.kz saityndaǵy «Jolaýshylarǵa» bóliminen alýǵa bolady.
«Jolaýshylar tasymaly» AQ baspasóz qyzmeti
