Tabysy az otbasylardyń balalaryna arnalǵan kepildendirilgen áleýmettik toptamada ne bar? QR Eńbek jáne halyqty áleýmettik qorǵaý ministrligi túsindirip berdi, dep habarlaidy "Ult aqparat".
QR Eńbek jáne halyqty áleýmettik qorǵaý ministrligi QR Densaýlyq saqtaý ministrligi men QR Bilim jáne ǵylym ministrliginiń usynymdary negizinde ataýly áleýmettik kómek alatyn tabysy az otbasylardyń balalaryna arnalǵan 2020 jylǵy 1 qańtardan berile bastaityn kepildendirilgen áleýmettik toptamany tanystyrdy.
«Kepildendirilgen áleýmettik toptama 1 jastan 6 jasqa deiin jáne 6 jastan 18 jasqa deiingi balalarǵa beriledi. 1 jastan 6 jasqa deiingi balalarǵa azyq-túlik jáne turmystyq himiia taýarlarynyń jiyntyqtary qosylady dep josparlanýda. Óz kezeginde azyq-túlik jiyntyǵy: 1-den 3 jasqa deiin jáne 3-ten 6 jasqa deiin balalardyń jas sanatyna bailanysty ár túrli bolady. QR DSM usynymdaryna sáikes azyq-túlik jiyntyqtary fiziologiialyq erekshelikterdi, azyq-túliktiń taǵamdyq jáne energetikalyq qundylyǵynyń araqatynasy men balanyń jasyna sáikes olardy paidalaný normalaryn eskere otyryp qalyptastyrylǵan jáne bul jiyntyq AÁK taǵaiyndaý kezeńinde aiyna bir ret beriledi» delingen habarlamada.
1 jastan 3 jasqa deiingi balalarǵa arnalǵan tamaq ónimderiniń jiyntyǵyna: ýltra pasterlengen sút 2,5%, 1,95 l; balalar pechenesi (5 aidan bastap balalarǵa arnalǵan), 180 gr; ólshep oralǵan untaq jarmasy, 700 gr; balalarǵa arnalǵan gipoallergendi botqalar assortimenti (5 aidan asqan balalarǵa arnalǵan), 320 gr; balalar piýresiniń gipoallergendi assortimenti, 1150 gr; júgeri jarmasy, 400 gr; býyp-túiilgen suly úlpekteri, 800 gr kiredi.
3 jastan 6 jasqa deiingi balalarǵa arnalǵan azyq-túlik jiyntyǵyna: 2,5%, 1,95 l ýltra pasterlengen sút; bidaidyń qatty sorttarynan jasalǵan makarondar, 800 gr; býyp-túiilgen suly úlpekteri, 800 gr; kúnbaǵys maiy, 0,8 l; klassikalyq gematogen, 240 gr; quramynda untaqtalmaǵan dánderi bar tańǵy asqa arnalǵan sút úlpekteri, 250 gr; temirge, S jáne V dárýmenderge bai balalar pechenesi (5 aidan bastap balalarǵa arnalǵan), 360 gr; ólshep oralǵan arpa jarmasy, 1 kg; ólshep oralǵan qaraqumyq jarmasy, 1600 gr; jarylǵan burshaq, 800 gr; ólshep oralǵan untaq jarmasy, 700 gr; tabiǵi bal, 200 gr kiredi.
Bul jinaqtar balanyń kúndizgi tamaqtaný ratsionyn qamtamasyz etýge arnalmaǵanyn, olardyń maqsaty – ósip kele jatqan aǵzadaǵy vitaminderdiń jetispeýshiligin óteý ekendigin atap ótken jón.
1 jastan 6 jasqa deiingi balalarǵa arnalǵan turmystyq himiia taýarlarynyń jiyntyǵynyń quramyn da QR DSM anyqtady. Oǵan jeke gigiena zattary (birinshi qajettilik): balalar kremi, krem-sabyn, kir sabyn, tis pastasy, balalar sýsabyny, tis shetkasy, kir jýatyn untaq kirdi. Mundai jiyntyqpen tabysy az otbasylardan shyqqan balalar AÁK taǵaiyndaý kezeńinde toqsanyna bir ret qamtamasyz etiledi.
6 jastan 18 jasqa deiingi balalarǵa arnalǵan kepildi paket 4 bólikten turady. Oǵan: oqý orny boiynsha bir rettik mektepte tamaqtaný, mektep formasymen qamtamasyz etý, mektep jabdyqtarymen qamtamasyz etý, qalalyq kólikte jol júrýdiń 50% óteý kiredi.
Mektep formasynyń, sondai-aq mektep kerek-jaraqtarynyń jiyntyqtarymen balalar jylyna bir ret qamtamasyz etiledi. Olardy satyp alýǵa arnalǵan sertifikattar oqý jyly bastalar aldynda, tamyz aiynda beriledi dep josparlanyp otyr.
Uldarǵa arnalǵan mektep formasynyń jiyntyǵyna kelesi ataýlar kiredi: pidjak, jilet, shalbar, merekelik kóilek, kúndelikti kóilek, qysqy ýaqytta – trikotaj keýdeshesi. Qyzdar úshin: pidjak, jilet, iýbka, klassikalyq jeide. Qysqy ýaqytta-trikotaj keýdeshe men sarafan.
Bastaýysh, orta jáne joǵary synyp balalaryna arnalǵan mektep kerek-jaraqtarynyń jiyntyǵy óz quramy boiynsha erekshelenetin bolady dep boljanýda.
Bastaýysh mektep oqýshylaryna arnalǵan komplektke: riýkzak, kúndelik, 20 dana juqa dápter, qalamsaýyt, sýret albomy, sharikti qalamdar – 5 dana, jai qaryndashtar – 10 dana, muqabalar – 15 dana, plastilin, akvareldi boiaýlar, syzǵysh jáne óshirgish kiredi.
Orta mektep oqýshylary úshin jiyntyqta: riýkzak, kúndelik, 20 dana juqa dápter, jalpy dápterler – 10 dana, penal, sýret salý albomy, sharikti qalamdar – 5 dana, jai qaryndashtar – 10 dana, muqabalar – 15 dana, syzǵysh jáne óshirgish bolady.
Joǵary mektep oqýshylaryna arnalǵan komplektke: riýkzak, kúndelik, juqa dápterler – 20 dana, jalpy dápterler – 10 dana, qalamsaýyt, sharikti qalamdar – 5 dana, qarapaiym qaryndashtar-10 dana kiredi.
Oqý orny boiynsha kúndelikti mektepte tamaqtaný belgilengen normalar boiynsha júzege asyrylady.
Jeńildetilgen jol júrýge keletin bolsaq, «Qazaqstan Respýblikasyndaǵy kólik týraly» Zańnyń 13-baby 7-den 15 jasqa deiingi balalarǵa qoǵamdyq kólikte bilet baǵasynan 50% jeńildik túrindegi jol júrýge kepildik beredi.
