Jol ortasynda salto jasaǵan almatylyq ekinshi ret jaýapqa tartyldy, dep habarlaidy QazAqparat.
Almaty kósheleriniń birinde jas jigit qaýipti triýk jasady. Ol joldyń bir betinen ekinshi betine salto jasap ótti.
Onyń videosyn Almaty qalalyq PD basshysynyń orynbasary Rústem Ábdirahmanov óziniń Instagram -daǵy paraqshasynda jariialady.
Aita keteiik, buǵan deiin videodaǵy jas jigit QR Ákimshilik quqyq buzýshylyq týraly kodekstiń 590-baby 2-bóligi (memlekettik tirkeý nómiri belgileri joq nemese paidalanýǵa tyiym salynǵannan keiin nemese belgilengen tártippen tirkelmegen kólikti basqarý) jáne 593-baptyń 2-bóligi (qaýipsizdik beldikterin nemese motoshlemderdi paidalaný qaǵidalaryn saqtamaý) boiynsha ákimshilik jaýapqa tartylǵan bolatyn.
«Bul joly jolaýshy ornynda otyrǵan ol kóshe qiylysynda toqtap turǵan kólikten atyp shyǵyp joldyń bir betinen ekinshi betine salto jasap ótti. Keiin joldan qaita ótip, kólikke oraldy. Almatylyq ekinshi ret jol erejesin buzǵany úshin ÁQBtK 615-babynyń 1-bóligi boiynsha ákimshilik jaýapqa tartyldy», - dep jazdy Rústem Ábdirahmanov.
