Bilim jáne ǵylym ministrligine qarasty joǵary oqý oryndaryna stýdentterdi oqytatyn jańa ádisteme usynylady. Bul týraly Bilim jáne ǵylym ministri Ashat Aimaǵambetov Facebook paraqshasynda jazdy, dep habarlaidy "Ult aqparat".
«Ókinishke qarai, joǵary oqý oryndarynyń kóbiniń qoldanatyn ádistemeleri kúmán týǵyzady. Oqytýshynyń júktemesi 800 saǵatqa deiin jetse, sabaqtarǵa daiyndalýǵa nemese ǵylymi baǵyttaǵy jumystarmen ainalysýǵa onyń ýaqyt tabýy qiynǵa túsedi. Sondyqtan jaqyn arada ministrlikke qarasty joǵary oqý oryndaryna jańa ádisteme usynylady», - dep jazdy Bilim jáne ǵylym ministri.
Ministrdiń aitýynsha quramynda sarapshylar, joǵary oqý oryndarynyń prorektorlary men oqytýshylar bar jumys toby bul máselege jumyldyrylǵan.
«Júktemeni birden avtomatty túrde tómendetý qalaǵan nátijege jetkizbeidi. Keibir oqý oryndary oqytýshylardyń júktemesin birden 400-500 saǵatqa deiin tómendetken bolatyn. Bul rette JOO-daǵy jalpy saǵat kólemi azaimady, kerisinshe qosymsha oqytýshylardy jumysqa qabyldaý qajettigi paida boldy. Sebebi, bir oqytýshyǵa beriletin stavka kólemi 1,5-ten aspaýy kerek. Nátijesinde ýniversitet biliktiligi tómendeý oqytýshylardy jumysqa alýǵa májbúr boldy. Árine, munyń oqý sapasyna keri áser etkenin aitpasa da túsinikti. Degenmen, bul máseleni sheshýimiz qajet. Ony kezeń-kezeńmen jáne júieli túrde sheshemiz», - dedi ol.
