Prezident joldaýyn iske asyrý boiynsha «JASTAR: ózekti másele» saraptamalyq alańy quryldy. Bul týraly Aqparat jáne qoǵamdyq damý ministrligi habarlady.
Búgin «JASTAR: ózekti másele» alańynyń alǵashqy saraptamalyq onlain-otyrysy ótti. Onda Memleket basshysynyń jastar saiasatynyń ózekti máseleleri konteksindegi Joldaýdyń negizgi erejeleri, sondai-aq ony iske asyrýdaǵy jańa tásilderi talqylandy. Is-sharaǵa Aqparat jáne qoǵamdyq damý vitse-ministri Ashat Oralov, QR Parlamenti Senaty apparaty basshysynyń orynbasary M. Spotkai, QR Joǵarǵy Soty apparaty basshysynyń orynbasary N. Baitilesov, «Atameken» QR Ulttyq kásipkerler palatasy Basqarma tóraǵasynyń orynbasary O. Ordabaev, QR Kásipodaqtar federatsiiasy tóraǵasynyń orynbasary Q. Janabekov, «Nur Otan» partiiasy Saiasi menedjment mektebiniń direktory Sh. Nurlanov, «Green TAL» áleýmettik sheberhanasynyń negizin qalaýshy E. Askerov, sondai-aq ǵylymi qoǵamdastyq, ÚEU jáne «Jastar» ǴZO ókilderi qatysty.
Búgingi tańda qazirgi qoǵamnyń damý dinamikasy tez jáne sapaly sheshimderdi talap etedi. «JASTAR: ózekti másele» alańyndaǵy ashyq dialog formaty jastardy áleýmettik damytýdyń eń ózekti máselelerin tiimdi sheshýge múmkindik beredi. Tájiribe almasý, saraptamalyq baǵalaý, odan ári is-qimyl júiesin qurý atalǵan pikirtalas platformasy jumysynyń nátijesi bolýy kerek.
«Jastar máselesi árqashan mańyzdy memlekettik baǵyttardyń biri retinde, nazardan tys qalǵan emes. Memleket basshysy Qazaqstan halqyna Joldaýynda jastardy eńbekke baýlý, qorshaǵan ortany qorǵaý jáne qumar oiyndar men jeńil aqsha tabý siiaqty jastardy azdyratyn teris qumarlyqtan aryldyrý máselelerin kótergen bolatyn», - dep atap ótti vitse-ministr Ashat Oralov.
Óz kezeginde «Atameken» QR Ulttyq kásipkerler palatasy Basqarma tóraǵasynyń orynbasary Oljas Ordabaev halyq arasyndaǵy kúrdeli jaǵdaidy atap ótti.
«Mobildik jumyspen qamtý ortalyqtaryndaǵy azamattardyń kópshiligi joǵary bilimi bar, biraq olardyń 60%-i soft-skills daǵdylaryna ie bolmaǵandyqtan jumysqa ornalasýǵa múmkindigi joq», - dedi ol.
Sondai-aq, búgingi tańda jastar mamandyq tańdaýdy biznes prizmasy arqyly qarastyratynyn jáne «Atameken» UKP qyzmeti osy biznesti damytýǵa baǵyttalǵanyn atap ótti.
«Green TAL» áleýmettik sheberhanasynyń negizin qalaýshy Emin Askerov óz sózinde áleýmettik kásipkerlikti damytý úshin jastardy jastar resýrstyq ortalyqtary arqyly belsendi túrde tartý qajet ekenin aitty: «Qazir qalai kóbirek alý kerektigin emes, qalai kóbirek berý kerektigi týraly oilaný kerek. Búgingi tańda Qazaqstanda 250 áleýmettik kásipker bar jáne jas kásipkerler sanyn arttyrý úshin áleýmettik biznes boiynsha konkýrstar uiymdastyrýdy qaita bastaý qajet».
Ashyq talqylaýdy qamtamasyz etý úshin aldaǵy ýaqytta ártúrli saladaǵy sarapshylar, jas ǵalymdar, ǵylymi qoǵamdastyqtyń, ortalyq memlekettik jáne jergilikti atqarýshy organdardyń, úkimettik emes uiymdardyń ókilderi shaqyrylatyn bolady.
