Búgin Májilistiń jalpy otyrysynda «Qazaqstan Respýblikasynyń sot júiesi men sýdialarynyń mártebesi týraly» Qazaqstan Respýblikasynyń Konstitýtsiialyq zańyna ózgerister men tolyqtyrýlar engizý týraly» QR Konstitýtsiialyq zań jobasy birinshi oqylymda maquldandy, dep habarlaidy QazAqparat.
Qujatty Qazaqstan Respýblikasy Parlamenti depýtattary ázirlep, zań shyǵarý bastamasy tártibimen engizdi. Ákimshilik rásimdik-protsestik kodeksti qabyldaý jáne ony 2021 jylǵy 1 shildeden bastap qoldanysqa engizý sot júiesiniń jumysyna túzetýler engizýdi talap etedi.
«Qazaqstan Respýblikasy Joǵarǵy sotynyń jáne oblystyq sottardyń «Qazaqstan Respýblikasynyń sot júiesi men sýdialarynyń mártebesi týraly» Konstitýtsiialyq zańda belgilengen qoldanystaǵy qurylymy Ákimshilik rásimdik-protsestik kodekstiń mindetterine tolyq kólemde jaýap bermeidi. Zań jobasynyń túzetýleri eki bloktan turady», - dedi Májilis depýtaty Qanat Mýsin.
Birinshiden, Joǵarǵy sotta ákimshilik ister boiynsha sot alqasyn qurý usynylady. Qazirgi mamandandyrylǵan sot alqasy taratylatyn bolady. Oblystyq sottarda da tiisti sot alqalary qurylady.
Bul shara sot júiesine óńirlerde isterdiń bólinýine bailanysty únemi ózgerip otyratyn jaǵdaiǵa jedel den qoiýǵa múmkindik beredi.
«Zań jobasynda Memleket basshysy taǵaiyndaýǵa usynatyn Joǵarǵy sot Tóraǵasy jáne Joǵarǵy sot sýdialary laýazymyna kandidattarǵa qoiylatyn talaptarǵa qatysty ózgerister engiziledi. Bul túzetýler eldiń Joǵarǵy sot organyna quqyqtyń mamandandyrylǵan salalarynda, mysaly, salyq quqyǵynda nemese jer qoinaýyn paidalaný quqyǵynda kóp tájiribesi bar kórnekti zańgerlerdi tartýǵa baǵyttalǵan. Bul neǵurlym daýly ister boiynsha sot tóreliginiń sapasyn qamtamasyz etýge múmkindik beredi jáne búkil sot júiesine oń áserin tigizedi. Bul túzetýler Memleket basshysy usynǵan kandidattarǵa ǵana qatysty ekenin erekshe atap ótken jón. Olar basqa sýdialarǵa qatysty bolmaidy», - dedi depýtat.
Engiziletin normalar ákimshilik ádiletti engizýdiń bastapqy kezeńinde júktemeni teń bólýge, sondai-aq ákimshilik quqyq buzýshylyqtar men jariia daýlar týraly isterdi qaraý jónindegi sot praktikasynyń ara-jigin ajyratýǵa múmkindik beredi.
