Ýkraina Joǵarǵy Radasy Resei armiiasy men Reseidiń saiasi jáne áskeri basshylyǵynyń Ýkraina halqyna jasaǵan áreketin genotsid dep tanityn jarlyq qabyldady. Bul týraly Rada saity habarlady, dep jazady Azattyq.
Qujatty depýtattardyń 363-i qoldap daýys berdi.
"Resei qarýly kúshteriniń áreketi qylmystyq agressiia ǵana emes, onyń maqsaty - ýkrain halqyn joiý" dep jazylǵan jarlyq túsindirmesinde.
Qujatta Rada depýtattarynyń úndeýi BUU, Eýropa keńesiniń parlamenttik assambleiasy, Eýroparlament, EQYU jáne NATO uiymdaryna, sonymen birge memleketterdiń úkimetteri men parlamentterine joldanatyny aitylǵan. Rada olardan Resei áskeriniń Ýkrainadaǵy áreketin ýkrain halqyna jasalǵan genotsid dep tanýyn suraidy.
Buǵan qosa, Ýkraina parlamenti Z jáne V belgilerine tyiym salý týraly jarlyq qabyldady. Olardy kiimge, áleýmettik jelige, BAQ-qa, jarnamaǵa, qoǵamdyq oryndarda jazýǵa bolmaidy.
Aita keteiik, Býcha qyrǵynynan keiin Reseige Ýkraina halqyna genotsid jasady degen aiyptar taǵyla bastaǵan. Birneshe apta Resei áskeriniń baqylaýynda bolǵan Býcha qalasynda orys áskeri ketkennen keiin beibit turǵyndardyń máiitteri tabylǵan. Sońǵy málimet boiynsha qaladan 403 máiit tabylǵan. Ol adamdar Resei áskeriniń qolynan qaza tabýy múmkin.
