QR Ulttyq qaýipsizdik komiteti tóraǵasynyń orynbasary Nurǵali Belisbekovtyń aitýynsha, sońǵy jyldary san alýan terroristik aktsiialardyń aldyn alý sharalary atqarylyp, júzdegen adamnyń xalyqaralyq lańkestik uiymdaryna qosylýyna jol berilmedi. Degenmen, Siriiadaǵy áskeri qaqtyǵystarǵa qatysyp jatqan Qazaqstan azamattary bar. Búginde olardyń arasynda radikaldy kózqarasqa boi aldyrǵan adamdar az emes. Áskeri daiyndyǵy da joǵary. Sondyqtan ondai azamattar elge qaitip kelgennen keiin terroristik akt jasaýy ábden múmkin, dep xabarlaidy Baq.kz tilshisi.
Ulttyq qaýipsizdik komitetiniń málimetine sáikes, sońǵy bes jyldyń ishinde san alýan maqsattaǵy 64 terroristik jáne ekstremistik aktsiialardyń joly kesildi. Al aǵymdaǵy jyly ondai 9 áreket áshkerelendi.
«Aýǵanstan, Irak pen Siriiadaǵy áskeri qaqtyǵystar bastalǵaly beri xalyqaralyq terroristik uiymdardyń belsendiligi arta tústi. Osy ýaqytqa deiin terroristik lagerlerden 45 Qazaqstan azamaty deportatsiialandy. Óz erkimen oralǵan adamdar da az emes. Jalpy, bes jyldyń ishinde 445 adam sottaldy. Jyl basynan beri 25 adamǵa qatysty úkim shyǵaryldy, taǵy 50 jýyq adam ýaqytsha qamaý izoliatorynda otyr», - deidi N.Belisbekov "Qazirgi kezeńdegi ekstremizm men terrorizmniń aldyn alý men jolyn kesýdiń zańnamalyq jáne institýtsionaldyq sharalary" taqyrybyndaǵy "dóńgelek ústel" otyrysy barysynda.
Onyń sózine qaraǵanda, búginde Siriiadaǵy áskeri qaqtyǵystarǵa qatysyp jatqan Qazaqstan azamattary az emes. Olardyń basym bóligi radikaldy kózqarasta júr. Áskeri daiyndyqtary da joǵary. Sondyqtan dál osy azamattar elge qaitip kelse, terroristik aktiler qaitalanýy ábden múmkin.
«Qazirgi kezde biz ondai adamdardy ary ketse, 7 jylǵa sottai alamyz. Bul - eń joǵary jaza. Sondyqtan osy máseleni retteý kerek dep sanaimyz»,-dep atap kórsetti N.Belisbekov.
