videodan alynǵan kadr
Depýtat Jigýli Dairabaev Májilistiń jalpy otyrysynda jaqynda sottalǵan balalarynyń kinási joq ekenin málimdedi, dep habarlaidy Sputnik Qazaqstan.
Sondai-aq ol ózin qoldaýshylarǵa alǵysyn bildirip, balalary ádildik úshin sońyna deiin kúresetinin aitty.
"Qurmetti áriptester, aldymen sizderge rizashylyǵymdy bildirgim keledi. Balalaryma bailanysty týyndaǵan másele boiynsha kóbińiz depýtat, áriptes retinde qoldaý kórsetip jatyrsyzdar. Moraldyq jaǵynan ádildik tanytyp, quqyqtyq jaǵynan saýattylyq bildirgenderińizdi joǵary baǵalaimyn. Balalarymdy kináli dep eseptemeimin. Olar ádildik úshin kúresedi. Apelliatsiialyq sotqa júginip, abyroiyn qorǵaýǵa múddeli. Endeshe men Májilisten ne úshin ketýim kerek? Aýyl turǵyndary, sharýalar, ózimdi sailaǵan aýyl partiiasy maǵan úlken úmit artyp otyr", - dedi Dairabaev.
"Depýtattyq mandat ol oiynshyq emes. Halyqtyń úlken senimi. Sondyqtan men halyqtyń senimin aqtaimyn. Keýdemde janym soǵyp tursa, halyq úshin qyzmet etemin", - dep tolyqtyrdy ol.
Eske sala keteiik, prezidenttikke eks-kandidat, qazirgi Májilis depýtaty Jigýli Dairabaevtyń eki birdei uly – Marat Dairabaev pen Didar Moldahalyq 550 mln teńge sýbsidiia urlady dep aiyptaldy.
Alaiaqtyq týraly qylmystyq isti Taraz soty qarady. "Aýyl" partiiasy atynan sailanǵan depýtattyń uldarymen birge sot aldyna taǵy eki adam bardy.
Qylmystyq is boiynsha Jambyl oblysy ákimdigi aýyl sharýashylyǵy basqarmasy basshysynyń burynǵy orynbasary Erlan Kúlkeev, kásipker Eljan Elibai jáne Dairabaevtyń uldary – Didar Moldahalyq pen Marat Dairabaev aiyptaldy.
Sot anyqtaǵandai, aiyptalýshylar "Albion" qulpynai kóshetterin satyp alý úshin memleketten sýbsidiia alyp, bir bóligin jeke qajettiligine jumsaǵan. Memleketke 550 849 430 teńge shyǵyn keltirildi.
Sot tórteýin de alaiaqtyq jasaǵany úshin kináli dep tapty. Osylaisha Erlan Kúlkeev 6 jylǵa, Eljan Elibai 5 jylǵa bas bostandyǵynan aiyryldy. Al Didar Moldahalyq pen Marat Dairabaev Qylmystyq kodekstiń 63-babyn qoldanyp, árqaisysy shartty túrde 5 jylǵa sottaldy.
Budan bólek, sot Jambyl oblysy ákimdigi qarjy basqarmasynyń memlekettik shyǵyndy óndirý týraly azamattyq talap-aryzyn qanaǵattandyrdy:
- Kúlkeev pen Elibaidan memleket paidasyna – ortaq tártipte 167 924 830 teńge;
- Kúlkeev, Elibai, Dairabaev jáne Moldahalyqtan – ortaq tártipte 92 400 000 teńge;
- Dairabaev pen Moldahalyqtan ortaq tártipte 290 524 600 teńge óndirildi.
Úkim zańdy kúshine engen joq.
