Elordadaǵy «Dáýlet» sport kombinatynda tennisten erler men áielder arasynda Qazaqstan chempionaty aiaqtaldy, dep habarlaidy QazAqparat.
Qazaqstan tennis federatsiiasy málim etkenindei, bul jarystyń mańyzdylyǵy sol, jeńimpazdar jýyrda ótetin Astana Open týrnirine joldama aldy.
Áielder arasynda finalda osy dodanyń birinshi jáne ekinshi raketkalary Gózal Ainitdinova men Jibek Qulambaeva bas júldeni sarapqa saldy.
Bul birinshiliktegi eń uzaqqa sozylǵan báseke boldy. 3 saǵat 24 minýttyq matchta J.Qulambaeva 5:7, 7:6, 6:3 esebimen jeńiske jetti.
Osylaisha juptyq synda da úzdik shyqqan Jibek absoliýtti chempion atanyp, Astana Open WTA 250 týrniriniń joldamasyn utyp aldy. Al Gózal osy dodanyń irikteý saiysynda baq synaidy.
Óskemendik Tatiana Nikolenko Sofia Chýrsinany 6:2, 7:6 esebimen tize búktirip, qola júldege ie boldy.
Erler arasynda sońǵy básekede almatylyq Denis Evseev pen qyzyljarlyq Timofei Skatov kortqa shyqty. 2 saǵat 34 minýtqa sozylǵan kezdesýde T.Skatovtyń mereii ústem boldy – 7:5, 7:6.
Álemdik reitingte 275-orynda turǵan T.Skatov alǵash ret el chempionatynda jekelei jáne juptyq synda úzdik shyqty.
Timofei Astana Open ATP 250 týrnirinde, D.Evseev sonyń irikteý saiystarynda óner kórsetetin bolady.
Qola júlde Dmitrii Popkony súrindirgen Grigorii Lomakinniń qanjyǵasynda ketti.
