Jaqyn qarym-qatynas kezinde jezóksheni qylǵyndyryp óltirgen 19 jastaǵy temirtaýlyq 19 jylǵa bas bostandyǵynan aiyryldy. Onyń isi qaita qaraldy, - dep habarlaidy Tengrinews.kz.
Qaraǵandy oblysy Qylmystyq ister jónindegi mamandandyrylǵan aýdanaralyq sotynda jaqyn qarym-qatynas kezinde jezóksheni óltirip, odan aqsha men altyn buiymyn urlap ketken temirtaýlyqqa qatysty qylmystyq is qaita qaraldy. Sot talqylaýyna alqabiler qatysty. Olar aiyptaý úkimin shyǵardy.
Sotta aiyptalýshy jábirlenýshini paidakúnemdik maqsatta óltirip, keiin bergen aqshasyn, uialy telefony men altyn buiymdaryn urlaǵany anyqtaldy.
"Sottalýshy alqabiler úkimimen "paidakúnemdik nietpen kisi óltirgeni" jáne "urlyq" jasaǵany úshin kináli dep tanyldy (QK-niń 99-baby 2-bóligi 8-tarmaǵy, 188 baby 1-bóligi). Oǵan eń joǵary qaýipsizdik qylmystyq-atqarý júiesi mekemesinde jazasyn óteý jáne 19 jylǵa bas bostandyǵynan aiyrý jazasy taǵaiyndaldy. Jábirlenýshi tarap paidasyna moraldyq ziian keltirgeni úshin 10 million teńge óndirildi. Úkim zańdy kúshine engen joq", - dep habarlady Qaraǵandy oblystyq sot baspasóz qyzmeti ókilderi.
Aita keteiik, sottalǵan adamǵa qatysty qylmystyq is ótken jyly Qaraǵandy oblysynyń Qylmystyq ister jónindegi mamandandyrylǵan aýdanaralyq sotynda qaralǵan.
Ol kezde alqabiler soty aiyptalýshy jábirlenýshini abaisyzda óltirgen degen boljamǵa kelgen. Nátijesinde oǵan 1,6 jylǵa bas bostandyǵynan aiyrý jazasy kesildi. Alaida 2021 jyldyń qańtarynda prokýratýra birinshi úkimge shaǵymdanyp, Qaraǵandy oblystyq soty qylmystyq isti jańa qaralymǵa jiberdi. Burynǵy úkim kúshin joidy.
