Video kadry/instagram.com/my.zhez
Jezqazǵanda 5 jasar bala basqarǵan kólik turǵyndardy qaǵyp ketti. Oqiǵa saldarynan 5 adam zardap shekti, - dep habarlaidy «Ult aqparat» Tengrinews.kz-ke silteme jasap.
Kóliktiń adamdardy qaqqan sáti túsip qalǵan video áleýmettik jelide tarady. Oqiǵa qalanyń oiyn-saýyq oryndarynyń biriniń aldynda bolǵan. Kólik meiramhananyń aldyndaǵy alańda sál kólbeý jerde turdy. Kadrlarda onyń artqa qarai júrip bara jatqany jáne meiramhanadan shyqqan adamdar tobyna soǵylǵany kórinedi. Oqiǵadan birneshe sekýnd ótken soń kólikten jas bala júgirip shyǵady.
Videoǵa qaraǵanda, kólikti bala basqarǵan. Taǵy birneshe sekýndtan keiin kólikten áiel túsedi, ol aldymen zardap shekkenderdiń janyna baryp, sodan keiin kómekke júgirip bara jatqan erkekterge qarai bet alady.
Ulytaý oblysy politsiia departamentiniń baspasóz qyzmeti beinejazbaǵa qatysty túsinikteme berdi. Vedomstvo Jezqazǵanda jol-kólik oqiǵasy bolǵanyn rastap, onyń egjei-tegjeiin túsindirdi.
"Politsiia jol-kólik oqiǵasyn tirkedi, zardap shekkender joq. Kólikte otyrǵan 5 jasar balanyń tejegish tutqasyn alyp tastaǵany anyqtaldy. Saldarynan avtomobil ózdiginen júrip, jaiaý júrginshilerge baryp soǵysty. Túrli dene jaraqattaryn alǵan 4 jaiaý júrginshi aýrýhanaǵa jatqyzyldy. Tiisti saraptamalar taǵaiyndaldy", - dep habarlady baspasóz qyzmeti.
Ulytaý oblystyq densaýlyq saqtaý basqarmasynyń baspasóz qyzmeti zardap shekkenderdiń jaǵdaiyna qatysty málimdeme jasady. Vedomstvonyń málimetinshe, meditsinalyq mekemege jatqyzylǵan 4 adamnyń ishinde bir ǵana er adam bar. Onyń qabyrǵalary synǵan jáne ishki músheleri kógergen. Zardap shekken úsh áiel ambýlatoriialyq emdelýge jiberildi, olardyń da ishki aǵzalardyń kógergen.
