Soltústik Qazaqstan oblysy «Jezqazǵan-Petropavl» avtojolynda bir kúnde eki jol-kólik oqiǵasy tirkeldi. Bireýinde jedel járdem kóligi aýdarylyp qaldy, dep habarlaidy "Ult aqparat".
Jol-kólik oqiǵalarynyń beinejazbasy áleýmettik jelide jergilikti pablikterde tarady.
Qyzyljar aýdandyq politsiia bóliminiń málimetinshe, 29 shilde kúni saǵat 12.00 shamasynda «Jezqazǵan-Petropavl» avtojolynyń Beskól aýyly mańynda jol-kólik oqiǵasy tirkeldi. «Nissan Cefiro» kóliginiń júrgizýshisi, Beskól aýylynyń 1996 jyly týǵan turǵyny aldyndaǵy kólikti basyp ozbaq bolǵan. Alaida qaýipsizdikke kóz jetkizbei manevr jasap, «GAZel» kóligimen soqtyǵysty. Júk kóligin Petropavldyń 45 jastaǵy turǵyny basqarǵan.
Jol-kólik oqiǵasynyń saldarynan eki kóliktiń de jolaýshylary jaraqat aldy. Olar aýdandyq aýrýhanaǵa jetkizildi.
Mamandardyń aitýynsha, qazirgi ýaqytta protsessýaldy sheshim shyǵarý úshin material jinalyp jatyr.
Al ekinshi jol-kólik oqiǵasynda jeńil kólik pen jedel-járdem mashinasy soqtyǵysty. Oqiǵa tús kezinde bolǵan. Jedel járdem kóligi aýdarylyp qaldy. Ekinshi mashina da qatty zaqymdandy. Oqiǵa ornynda politsiia qyzmetkerleri jumys istep jatyr.
