Biyl bir-birine kórshi qonǵan, shekara syzyǵymen ózara «shetel» atanǵan qazaq-ózbek eki el arasynda mádeni almasýlar jyly bolmaq. Oǵan sebep, 2018 jyldyń Ózbekstannyń Qazaqstandaǵy jyly bolyp belgilenýi edi. Osyǵan bailanysty aýqymdy is-sharalar el aýmaǵynda bastalyp ta ketti. Sózimizdiń aiqyn kórinisi, “Ózbekstandaǵy Qazaqstan jyly” aiasynda jetisýlyq alǵashqy delegatsiia jolǵa da shyǵyp úlgerdi.
Bir eldiń mádeni máiegi men rýhani azyǵynyń moldyǵyn pash etýde sol eldiń óner kókjieginiń qanshalyqty keńdigi sarapqa salynatyny qandailyq aqiqat bolsa, jetisýlyq delegatsiianyń dittegeni de qazaqtai ulttyń ustyn-murat, mádeni ómiri men miýaly órkenietten ulasqan uly qasietterin tanytý bolatyn. Sol sebepti de Tashkent qalasynda ótetin Almaty oblysynyń kúnderinde Súiinbai atyndaǵy oblystyq filarmoniia, “Alataý áýenderi” kontserttik birlestigi, “Qulansaz” jáne “Úshqońyr” ansambliniń ujymy birlese otyryp, mádeni baǵdarlama usynady dep josparlanǵan.
Osy rette, atalǵan filarmoniia basshysy Daniiar Quramysov bul sharanyń tarihi mańyzǵa ie ekenin, eki el dostyǵynyń, ózara mádeniet almasýynyń kepili bolatynyn aita kelip, baǵdarlamanyń aýqymynyń da keń ekenin jetkizdi.
– Óner adamy bolǵandyqtan qai elge barsaq, sol eldiń ónerin kórsetýimiz qajet. Osy oraida ózimizdiń tól ónerimizben qatar, ózbek halqynyń da ánderin shyrqap, bilerin bileimiz. Daiyndyǵymyz joǵarǵy deńgeide, – dedi ol.
Budan bólek, Daniiar Quramysovtyń aitýynsha, atalmysh sharaǵa orai jańa sahnalyq kostiýmder de tigilgen. Osy ýaqytqa deiin gastroldik saparmen kóptegen sheteldi aralap kelgen úlken ujym úshin bul úlken múmkindik alańy bolyp otyr. Óitkeni, mundai saparlardan ónerpazdar mol tájiribe jinaityny anyq. Onyń ústine mundai ági sharalar shyǵarmashylyq adamdary úshin únemi izdeniste bolýdyń, tek qana alǵa qarai talpynýdyń mańyzdylyǵyn uǵyndyra túsetini bar. «Bul, tipti, jetisýlyq ónerpazdar úshin shyǵarmashylyq shabyt sapary deýge bolady» deidi atalmysh filormoniia basshysy.
Shyǵarmashylyq shabyt demekshi, mundai múmkindikke bul joly júzden júirik, myńnan tulpar tanylǵan 116 ónerpaz ie bolyp otyr. Olar osy barysta kórshiles memlekette qazaqtyń, sonyń ishinde Jetisýdyń jurtynyń ónerin pash etetyn bolady. Osy barysta qatysýshylar yntymaqtastyqty damytýǵa jáne tájiribe almasý maqsatynda uiymdastyrylǵan bul shara baýyrlas halyqtardy odan ármen jaqyndastyra túsedi dep atap ótti.
Aita keteiik, Tashkent qalasyda ótetin aýqymdy shara sáýir aiynyń 12-15 juldyzy aralyǵyna josparlanyp otyr.
Qozybai QURMAN,
Almaty oblysy
