Eskeldi aýdanyndaǵy №6/6 jedel járdem brigadasy shaqyrtýdan qaityp kele jatqanda Tekeli baǵytyna aparar tas joldyń boiynda órtke oranǵan úidi baiqap qalǵan. Meditsinalyq qyzmetkerler Ǵabit Erǵajy, Damira Rahimova jáne júrgizýshi Murat Sátekov birden áreketke kóshken.
Olar dereý toqtap, sirena men jaryq signaldaryn qosyp, kómekke umtyldy. Úidiń esigi jabyq bolǵan, al ishten eshqandai tirshilik belgileri baiqalmaǵan. Soǵan qaramastan, jedel járdem toby terezeler men esikterdi uryp, uiyqtap jatqan turǵyndardy oiatyp, olardy dalaǵa shyǵarýǵa kómektesti.
Úide 5 eresek adam men 2 bala, onyń ishinde omyraýdaǵy sábi bolǵan. Turǵyndar tek qujattaryn ǵana alyp úlgerip, jalyn qushaǵyndaǵy úiden aman shyqqan.
Adamdar qutqarylǵannan keiin sanaýly minýttar ishinde úi tolyǵymen janyp ketken.
