Foto: Polisia.kz
Jetisý oblysynyń Kóksý aýdanynda politsiia qyzmetkerleri jalpy quny 9 million teńgeden asatyn birneshe mal urlyǵy faktisin ashyp, qylmystyq toptyń jolyn kesti, dep habarlaidy Ult.kz.
Polisia.kz habarlaýynsha, 7 maýsym kúni Muqanshy aýyldyq okrýginiń jaiylymynan belgisiz bireýler 9 bas iri qarany urlap ketken. Jábirlenýshige keltirilgen shyǵyn 2,5 million teńgeni quraǵan.
Arada birneshe kún ótken soń, sol óńirdegi Alǵabas aýyldyq okrýgi aýmaǵynda taǵy bir urlyq tirkeldi. Bul joly qaskúnemder 14 bas iri qarany aidap áketip, sharýashylyq iesine 7 million teńgeden astam shyǵyn keltirgen.
Kóksý aýdandyq politsiia bóliminiń jáne oblystyq Kriminaldyq politsiia basqarmasynyń qyzmetkerleri júrgizgen jedel-izdestirý is-sharalarynyń nátijesinde 51 jáne 37 jastaǵy eki kúdikti qolǵa tústi. Ekeýi de Kóksý aýdanynyń jergilikti turǵyndary bolyp shyqty. Operatsiia barysynda MAN júk kóligi toqtatylyp, kólik ishinde urlanǵan maldyń satyp alýshysy retinde Almaty oblysynyń turǵyny ustaldy. Tekserý kezinde júk bóliginen jábirlenýshilerge tiesili 14 bas iri qara mal tabylyp, tárkilendi.
Atalǵan derekter boiynsha Qazaqstan Respýblikasy Qylmystyq kodeksiniń mal urlyǵyna qatysty baby boiynsha qylmystyq is qozǵaldy. Zań boiynsha mundai qylmys úshin úsh jyldan jeti jylǵa deiingi merzimge bas bostandyǵynan aiyrý jáne múlkin tárkileý túrindegi jaza qarastyrylǵan. Quqyq qorǵaý organdary tergeý sharalaryn jalǵastyryp, ustalǵan azamattardyń ózge de mal urlyǵyna qatysy bar-joǵyn muqiiat tekserýde.
