Kez kelgen tótenshe jaǵdaidyń aldyn alyp, túrli oqys oqiǵaǵa ár kez daiyn bolý kerek. Búginde bul jaǵdaiǵa aimaq basshylary erekshe kóńil bólip otyr. Sondyqtan osy baǵyttaǵy jumys ár eldi mekende qyzý júrýi tiis.
Osyǵan bailanysty Almaty oblysy ákiminiń birinshi orynbasary Lazzat TURLAShOV aýdan, qala ákimderi jáne oblystyq deńgeidegi basqarma basshylary men tiisti sala mamandarynyń qatysýymen selektorlyq jiyn ótkizdi. Tótenshe jaǵdai, azamattyq qorǵanys, selden qorǵaý men aýa raiyn boljaý ortalyǵynyń qyzmetkerleri qatysqan basqosýda kóktemgi sý tasqynynyń aldyn alý, daiyndyq sharalaryn kúsheitý jáne onyń qaýipsiz ótýin qamtamasyz etip, sý qoimalarynyń búgingi jaǵdaiyn qadaǵalaý jáne sý júretin aryqtardyń tazalanýy sekildi is-sharalar barysy jan-jaqty talqylandy.
Lazzat Mahatuly aldymen osyǵan qatysty máselelerge qysqasha sholý jasap, kelesi sózdi salaǵa jaýapty laýazymdy tulǵalarǵa usyndy. Mamandar osyǵan bailanysty atqarylyp jatqan jumys jaiyn egjei-tegjeili baiandady. Sala qyzmetkerleriniń aitýyna qaraǵanda, kóktemgi sý tasqynynyń aldyn alýǵa baǵyttalǵan is-sharalar óz deńgeiinde júrip jatyr. Óńir halqyn, aýmaǵyn jáne sharýashylyq nysandaryn sý tasqynynan qorǵaý jáne apattyq jaǵdailardy boldyrmaý maqsatynda biyl oblystyq biýdjet esebinen 560 mln. teńgeden asa qarajat bólinip, myńǵa jýyq tehnika, úsh jarym myńnan asa jumys kúshi jumyldyrylǵan. Qazir óńirde jetpisten asa sý qoimasy, seksen bes bóget bar. Sonyń segizi búgingi kúnge deiin kúrdeli jóndeýden ótken.
Jiynda eldi meken kóshelerindegi sý júretin aryqtardy tazalaý, qar shyǵarý, qaýipsizdiktiń aldyn alý is-sharalaryn júrgizip, osy boiynsha elmen jumys isteý, tehnika daiyndyǵy, ásirese, ózen-sýy bar óńirde ornalasqan eldi mekenderdi erekshe baqylaýǵa alý, bir sózben aitqanda, bul kezeńniń esh kedergisiz ótýi tiis ekendigi pysyqtaldy. Osyǵan bailanysty oblystyq tótenshe jaǵdailar departamenti, oblystyq aýylsharýashylyǵy basqarmasy, oblys boiynsha «QazSýShar» RMK filialy, Almaty gidrometeorologiia ortalyǵy MK filialy jáne Talǵar, Qarasai, Eńbekshiqazaq, Jambyl aýdandarynyń ákimderi esep berdi.
Lazzat Mahatuly kún tártibinde qaralǵan máselege qatysty oi qorytyp, kóktemgi sý tasqynyna jaýapty mekeme qyzmetkerlerine keshendi jumys josparyn qurýdy tapsyrdy. Tabiǵat tosyn minez tanytqanda tosylyp qalmai, osy bastan qamdaný qajettigin esekertti. Ásirese, taýly aimaqtarǵa táýlik boiy kezekshilik qoiý kerek ekenin nazarǵa saldy.
Jiynda, sondai-aq, «7–20–25» baǵdarlamasynyń oryndalý barysy qaraldy. Osyǵan bailanysty sala qyzmetkerleri sóz sóilep, osy baǵyt aiasynda júzege asyrylyp jatqan jumystardy baiandady. Onda belgili bolǵandai, atalmysh baǵdarlama boiynsha atqarylýy tiis jumystardy kúsheitý kerek. Óitkeni, aimaqta bul baǵyttaǵy jumystar qazir baiaý júrýde. Birqatar aýdanda qurylys aýqymynyń tómendigi baiqalady. Oblys ákiminiń birinshi orynbasary aýdan, qala ákimderine tapsyrma júktei otyryp, atalmysh baǵdarlamanyń talapqa sai oryndalýy tiis ekenin jáne osy baǵyttaǵy jumystardy óz deńgeiinde oryndap, esh kedergisiz júrýin qadaǵalaityn arnaiy mamandar taǵaiyndaý qajettigin, sondai-aq, aqparattyq-nasihattyq jumystardy jandandyrýǵa kúsh salyp, túsindirý jumystaryn úzdiksiz júrgizý kerektigin mindettedi.
Elbasynyń bes institýtsionaldyq reformasyn júzege asyrý maqsatyndaǵy «100 naqty qadam» – Ult josparynyń 32-qadamynyń oryndalý barysy da osy basqosýda saralandy. Bul týraly oblystyq sáýlet jáne qala qurylysy basqarmasy basshysynyń orynbasary Qoblan Manapov habarlama jasady. Biylǵy qurylys jumystarynyń kólemin josparlaý máselesi de nazardan tys qalǵan joq. Aita keteiik, ótken jyldyń qorytyndysyna sáikes, oblystyq statistika departamentiniń bergen málimetine qaraǵanda oblys boiynsha qurylys jumystarynyń kólemi 276 mlrd. 627,5 mln. teńgege oryndalǵan. Al biyl infliatsiiany esepke ala otyryp, 300 mlrd. teńgege jetkizý josparlanyp otyr.
Aigúl Baibosynova
