Almaty oblysynda sońǵy bes jylda 75 mektep salyndy, sonyń 30 myń oryndyq 55 mektebi úsh aýysymdy mektepterdiń máselesin sheshý úshin turǵyzylǵan. Oǵan jyl saiyn bilim salasyna bólinetin qarjynyń artýy septesip otyr. Mysaly atalǵan salaǵa bólingen qarjy biylǵy jyly 59 mlrd. teńgege ulǵaitylyp, 266 mlrd. teńgeni qurady. Sonyń 14 mlrd. teńgesi qurylysqa bólingen, bul ótken jylmen salystyrǵanda 6,6 mlrd. teńgegeartyq. Bul týraly Almaty oblysynyń ákimi A. Batalovtyń turǵyndar aldyndaǵy esep berý jiynynda belgili boldy.
Oblys ákiminiń aitýynsha, týý kórsetkishiniń artýy men ishki kóshi-qon esebinen jyl saiyn bala sany 20 myńǵa ósip otyr. Máselen, ótken jyly 48 myń bala mektep tabaldyryǵyn attap, birinshi synypqa barǵan. Qazir oblysta úsh aýysymda oqytatyn 38 mektep bar. Biylǵy jyly jalpy quny 11,2 mlrd. teńge bolatyn 13 mektep salynsa, sonyń 8-i úsh aýysymdylyqty joiýǵa baǵyttalady. Olar - Jambyl aýdanynyń Qasymbek, Jaisań aýyldaryndaǵy, Ile aýdanynyń Túimebaev, Qaraoi, Jápek batyr, Qosózen, Boraldai aýyldaryndaǵy, Qarasai aýdanynyń Shamalǵan aýylyndaǵy mektepter.
- Oǵan qosa biz jalpy quny 10,3 mlrd. teńge bolatyn taǵy 6 mekteptiń qurylysyn bastaýymyz kerek. Sol siiaqty jeke investitsiia esebinen mektep salý máselesin qarastyryp jatyrmyz. Qazirdiń ózinde memlekettik-jekemenshik áriptestik aiasynda Qaratal aýdanynyń Qojban aýylynda bastaýysh mektep, Qarasai aýdanynyń Áitei aýylynda 1200 oryndy mektep turǵyzyldy, - dedi A. Batalov.
Almaty oblysy ákiminiń baspasóz qyzmeti
