© Jetisý oblysynda áielimen ursysyp qalǵan er adam 8 ailyq náresteni tartyp alyp, jasyryn jerde ustap otyr. Tártip buzýshy ustaldy. Al sábidi eki qalanyń politseileri izdeýge kiristi, dep habarlaidy Sputnik Qazaqstan.
Bul oqiǵa týraly aqparat "NeMolchi.kz" qorynyń áleýmettik jelidegi paraqshasynda jariialandy. Dina Táńsáriniń aitýynsha, jas kelinshek 8 ailyq ulyn taba almai jatyr. Ony ákesi jasyryn jerde ustap otyr. Buǵan deiin er adam áieli men enesin urǵany úshin 15 táýlikke ákimshilik qamaýǵa alynǵan bolatyn.
"Sábi tabylmai jatyr. Ony bir jerge tyǵyp qoiǵan. Qaskeleń men Taldyqorǵan politsiiasyn, prokýratýrany jáne balalar ombýdsmenin tiisti shara qabyldap, náresteni anasyna qaitaryp berýdi suraimyz", - deidi Tańsári.
Jetisý oblystyq politsiia deparatmenti er adamnyń qamaýǵa alynǵanyn rastady. 31 tamyzda Qaskeleń qalasynyń 39 jastaǵy turǵyny 15 táýlikke ákimshilik qamaqqa alyndy.
"Ol Taldyqorǵanda turatyn 33 jastaǵy áieli men enesine qatysty Ákimshilik quqyq buzýshylyq kodeksiniń 73-1 baby (Densaýlyqqa qasaqana jeńil ziian keltirý) boiynsha jasaǵan quqyq buzýshylyq áreketi úshin ustalǵan bolatyn", - deidi politseiler.
Al qyrkúiektiń basynda áieli Taldyqorǵan qalalyq politsiia bólimine aryz túsirip, 8 ailyq sábiin taýyp berýdi surady. Onyń aitýynsha, 12 tamyzda kúieýi janjal shyǵaryp, sábidi alyp ketken.
Qazirgi kezde náresteni Taldyqorǵan men Qaskelen politseileri izdestirip jatyr.
