Foto: ru.sputnik.kg
Jetisý oblysy Qaratal aýdany Úshtóbe aýylynda 8-shi synyp oqýshysy egde jastaǵy muǵalimdi urdy, dep habarlaidy Sputnik Qazaqstan.
Oqýshydan soqqy jegen Dýlat Moldybaiuly Ahmetjanov - matematika pániniń muǵalimi, 34 jyldyq eńbek ótili bar pedagog. Oqýshy men pedagog arasyndaǵy keleńsiz jaǵdai 14 sáýirde bolǵan.
"Oqýshyǵa aldynda sabaqta tynysh otyrmaǵan soń eskertý jasadym. Qaita-qaita eskertý jasaǵan soń, ol boqtyq sóz aitty. Ata-anasyna aityp eskerttim. Bala boqtady eken dep, sabaqta salǵylasyp turatyn emes, tárbie isi jónindegi orynbasarǵa aittym. Ol kisi sóilesti, biraq oqýshy tynyshtalmady. Sol sabaq ústindegi tentektigin kórsetip júrdi", - deidi Dýlat Ahmetjanov.
Oqýshynyń bul qylyǵy synyptastarynyń da ashýyna tigen. Olar muǵalimine arasha túspek bolǵan. Olar muǵalim aǵailaryna ońasha kelip, synyptastarynyń aitqanyn aityp, shaǵymdana bastaǵan.
"Sosyn ata-anasynyń kózinshe, oqýshynyń klastasy "sen osylai aittyń, bylai aittyń" dep edi, oqýshy urmaq bolyp tura umtyldy. Men "qoi, onyń ne" dep tosqaýyldap em, sol jerde 2-3 ret meni uryp jiberdi. Basym qanap, ábigerge tústim. Meniń júregim onsyz da aýyryp júrgen adammyn, bul balamen jumys istei almaimyn dedim. Biraq, zańǵa tartyp, ol balanyń bolashaǵyna balta shabý oiymda joq", - deidi pedagog.
Oqiǵa bolǵan sátte quzyrly oryndardan mamandar shaqyrtylǵan.
"Sabaq arasyndaǵy uzaq úzilis kezinde muǵalim men oqýshy arasynda kikiljiń týyndaǵan. Ustaz oqýshyǵa eskertý jasaǵan, al bul jait balaǵa unamaǵan kórinedi. Muǵalim aýrýhananyń kómegine júginbegen, politsiiaǵa aryz jazýdan bas tartqan. Aýdannyń prokýratýrasy baryp, mektepte profilaktikalyq jumys júrgizdi. Al, oqýshynyń ata-anasy balasyn basqa aýdandaǵy mektepke aýystyrý jóninde sheshimge keldi. Jaýapty mekemeler oqiǵany qadaǵalaýǵa aldy", - delingen Jetisý oblysy prokýratýrasynyń baspasóz qyzmetiniń habarlamasynda.
Mektep ákimshiliginiń aitýynsha, muǵalimdi soqqan balanyń anasy da - matematika pániniń muǵalimi. Qazirgi kúni oqýshy sabaqqa baryp júrgen joq. Ol basqa mektepte oqýdy jón kóripti.
