فوتو: ru.sputnik.kg
جەتٸسۋ وبلىسى قاراتال اۋدانى ٷشتٶبە اۋىلىندا 8-شٸ سىنىپ وقۋشىسى ەگدە جاستاعى مۇعالٸمدٸ ۇردى, دەپ حابارلايدى Sputnik قازاقستان.
وقۋشىدان سوققى جەگەن دۋلات مولدىبايۇلى احمەتجانوۆ - ماتەماتيكا پەنٸنٸڭ مۇعالٸمٸ, 34 جىلدىق ەڭبەك ٶتٸلٸ بار پەداگوگ. وقۋشى مەن پەداگوگ اراسىنداعى كەلەڭسٸز جاعداي 14 سەۋٸردە بولعان.
"وقۋشىعا الدىندا ساباقتا تىنىش وتىرماعان سوڭ ەسكەرتۋ جاسادىم. قايتا-قايتا ەسكەرتۋ جاساعان سوڭ, ول بوقتىق سٶز ايتتى. اتا-اناسىنا ايتىپ ەسكەرتتٸم. بالا بوقتادى ەكەن دەپ, ساباقتا سالعىلاسىپ تۇراتىن ەمەس, تەربيە ٸسٸ جٶنٸندەگٸ ورىنباسارعا ايتتىم. ول كٸسٸ سٶيلەستٸ, بٸراق وقۋشى تىنىشتالمادى. سول ساباق ٷستٸندەگٸ تەنتەكتٸگٸن كٶرسەتٸپ جٷردٸ", - دەيدٸ دۋلات احمەتجانوۆ.
وقۋشىنىڭ بۇل قىلىعى سىنىپتاستارىنىڭ دا اشۋىنا تيگەن. ولار مۇعالٸمٸنە اراشا تٷسپەك بولعان. ولار مۇعالٸم اعايلارىنا وڭاشا كەلٸپ, سىنىپتاستارىنىڭ ايتقانىن ايتىپ, شاعىمدانا باستاعان.
"سوسىن اتا-اناسىنىڭ كٶزٸنشە, وقۋشىنىڭ كلاستاسى "سەن وسىلاي ايتتىڭ, بىلاي ايتتىڭ" دەپ ەدٸ, وقۋشى ۇرماق بولىپ تۇرا ۇمتىلدى. مەن "قوي, ونىڭ نە" دەپ توسقاۋىلداپ ەم, سول جەردە 2-3 رەت مەنٸ ۇرىپ جٸبەردٸ. باسىم قاناپ, ەبٸگەرگە تٷستٸم. مەنٸڭ جٷرەگٸم ونسىز دا اۋىرىپ جٷرگەن اداممىن, بۇل بالامەن جۇمىس ٸستەي المايمىن دەدٸم. بٸراق, زاڭعا تارتىپ, ول بالانىڭ بولاشاعىنا بالتا شابۋ ويىمدا جوق", - دەيدٸ پەداگوگ.
وقيعا بولعان سەتتە قۇزىرلى ورىنداردان ماماندار شاقىرتىلعان.
"ساباق اراسىنداعى ۇزاق ٷزٸلٸس كەزٸندە مۇعالٸم مەن وقۋشى اراسىندا كيكٸلجٸڭ تۋىنداعان. ۇستاز وقۋشىعا ەسكەرتۋ جاساعان, ال بۇل جايت بالاعا ۇناماعان كٶرٸنەدٸ. مۇعالٸم اۋرۋحانانىڭ كٶمەگٸنە جٷگٸنبەگەن, پوليتسيياعا ارىز جازۋدان باس تارتقان. اۋداننىڭ پروكۋراتۋراسى بارىپ, مەكتەپتە پروفيلاكتيكالىق جۇمىس جٷرگٸزدٸ. ال, وقۋشىنىڭ اتا-اناسى بالاسىن باسقا اۋدانداعى مەكتەپكە اۋىستىرۋ جٶنٸندە شەشٸمگە كەلدٸ. جاۋاپتى مەكەمەلەر وقيعانى قاداعالاۋعا الدى", - دەلٸنگەن جەتٸسۋ وبلىسى پروكۋراتۋراسىنىڭ باسپاسٶز قىزمەتٸنٸڭ حابارلاماسىندا.
مەكتەپ ەكٸمشٸلٸگٸنٸڭ ايتۋىنشا, مۇعالٸمدٸ سوققان بالانىڭ اناسى دا - ماتەماتيكا پەنٸنٸڭ مۇعالٸمٸ. قازٸرگٸ كٷنٸ وقۋشى ساباققا بارىپ جٷرگەن جوق. ول باسقا مەكتەپتە وقۋدى جٶن كٶرٸپتٸ.
