videodan alynǵan kadr
Taldyqorǵandaǵy sot ǵimartynyń aýmaǵynda Memlekettik Eltańba aiaq astynda taptalyp jatyr. Muny Sandýǵash Dúisenova esimdi qoldanýshy videoǵa túsirgen, - dep habarlaidy Massaget.kz.
"Jetisý oblystyq soty. Qazir Sandýǵashtyń timiskilenip, kirmeitin jeri joq dep aitasyńdar. Iá, timiskilenemin, kiremin. Sumdyq qoi mynaý. Memlekettik Eltańba aiaqtyń astynda taptalyp jatyr", - deidi video avtory.
Bul jaǵdai Jeli qoldanýshylarynyń da ashýyna tigen.
Jetisý oblystyq sotynyń baspasóz qyzmeti Eltańba jaqyn arada aýystyrylǵanyn, sonymen qatar oblystyq sot ǵimaratynda jóndeý jumystarynyń bastalýyna bailanysty Eltańbanyń maketi sol kúni syrtqa shyǵarylǵanyn habarlady.
"Alaida ol jumys kúniniń sońyna deiin saqtaý qoimasyna qaita qoiylýy kerek edi. Negizgi quraldardy esepten shyǵarý kestesine sáikes, Eltańba 2023 jylǵy 31 shildede joiylýǵa tiis bolatyn. Oǵan deiin eski Eltańba sot ǵimaratynda saqtalýy kerek", - dedi sottyń baspasóz qyzmeti.
Oblystyq politsiia departamenti de bul videony zerttegen.
Atalǵan fakti boiynsha QR Ákimshilik quqyq buzýshylyq týraly kodekstiń 418-babynyń 1-1-bóligine sáikes, oblystyq sot ákimshiliginiń Infraqurylymdy damytý bóliminiń basshysy jaýapkershilikke tartyldy.
Jetisý oblysy politsiia departamenti video avtoryna azamattyq ustanymyn kórsetip, quqyq qorǵaý organdaryna habarlap, anyqtaýǵa kómekteskeni úshin alǵys aitty.
