«Jetisý» fýtbol klýbynyń biýdjeti 2,3 mlrd teńgege qysqardy, dep habarlaidy QazAqparat.
«2020 jyly «Jetisý» fýtbol klýbynyń biýdjeti - 3,4 mlrd teńge, al voleibol klýbynyń byltyrǵy biýdjeti - 800 mln teńge bolǵan. 2021 jyly «Jetisý» fýtbol jáne voleibol klýbtaryn ustaýǵa jumsalatyn shyǵyndy qysqartýǵa qatysty 2,9 mlrd teńge únemdelip, ol qarajat qaita baǵyttaldy», - dedi Almaty oblysynyń dene shynyqtyrý jáne sport basqarmasynyń basshysy Nurbaqyt Teńizbaev oblys máslihatynyń birlesken otyrysyndaǵy baiandamasynda.
Basqarma basshysynyń sózinshe, únemdelgen qarjy esebinen 127 Street workoaut sport alańy ornatylady.
«Máselen, buqaralyq sportty damytý maqsatynda oblysta 127 street workout alańyn ornatýǵa 361 mln 500 000 teńge, shaǵyn fýtbol alańdaryn jáne 35 sport alańyn ashýǵa 374,9 mln teńge, Alakól aýdanynyń Lepsi aýylynda dene shynyqtyrý-saýyqtyrý kesheniniń qurylysyn bastaýǵa 388,2 mln teńge bólindi», - dedi Nurbaqyt Teńizbaev.
Basqarmanyń aqpatyna sáikes, jalpy oblystyń aýdandary men qalalarynyń 45 sport mektebinde 74 sport túrimen 44 038 sportshy shuǵyldanady.
«Barlyq qoldanystaǵy sporttyq nysandar dene shynyqtyrý jáne sportpen shuǵyldaný úshin qol jetimdi jáne tegin túrde qyzmet jasaidy. Oblysta dene shynyqtyrýmen jáne sportpen júieli túrde ainalysatyndardyń sany - 667 428 adam. Bul - oblys halqynyń 32%», - dep tolyqtyrdy basqrama basshysy N. Teńizbaev.
Aita keteiik, búgin Almaty oblystyq máslihatynyń eki komissiiasynyń birlesken otyrysy ótti.
Basqosýda basqarma basshylary 10 aida atqarylǵan jumysty baiandap, aldaǵy josparyn bólisti.
