Túrkistan oblysyna qarasty Jetisai aýdanynda aýylda turyp-aq istiń kózin taýyp, kásibin jandandyryp otyrǵan azamat bar.
Sózsiz, búgingi qoǵamda jastardy aýylǵa tartý, jumyspen qamtý máselesi ózekti bolyp otyr. Aýyldan shyqqan jastardyń sol baiaǵy jumystyń joqtyǵyn syltaý etetini bar. Biraq Túrkistan oblysy, Jetisai aýdany Qyzylqum eldi mekeniniń turǵyny Didar Aqpanov bul qoǵamdyq qasań pikirmen múlde kelispeidi. Óitkeni ol aýylda turyp-aq istiń kózin taýyp, birneshe otbasynyń tútininiń túzý ushýyna yqpal etip otyrǵan isker azamat.
Búginde onyń komandasynda aýyldyń 16 azamaty jumys isteidi. Osydan týra 6 jyl buryn úiiniń irgesinen plastikalyq esik-tereze jinaýǵa kirisken onyń qazirgi tańda Jetisai aýdanynda birneshe ustalyq shaǵyn tsehtary bar. Budan bólek, jihaz jinap, temir qaqpa ázirlep, san-salaly tirliktiń kózin taýyp otyrǵan ol jýyrda ǵana úiiniń irgesinen «Yqylas» atty zamanaýi úlgidegi azyq-túlik dúkenin ashypty.
«Aýylda jumys joq deitin jastarǵa kelispeimin. Kózin tapsań, bárin isteýge bolady. Tek ynta men jiger kerek. Men kásibimdi 2012 jyly shaǵyn ǵana tsehta bastadym. Eń birinshi, aýylǵa plastikalyq esik-tereze jinaityn qurylǵylar men qondyrǵylardy satyp ákeldim. Ózimiz izdendik, úirendik. Sapaly taýar jasap shyǵarýǵa umtyldyq. Keiinnen suranystar da túse bastady. Qazirgi tańda bizdiń jigitter jihaz jinap, plastikalyq, temir esik, tereze, qaqpa daiyndaidy. Bári aýyldyń jigitteri. Ailyqtary ýaqytyly», - deidi Didar Aqpanov.
Barlyq istiń basy-qasynda Didardyń ózi júredi eken. Basshy ekenmin dep qarap otyrmaidy. Búginde ol 4 balanyń ákesi.
«Alǵa qoiǵan maqsat-mindetterim óte kóp. Tek ýaqytty tiimdi paidalanyp, josparly túrde is-áreket jasaý ǵana qalyp tur. Keleshekte dál osy qarashańyraqtyń aýlasynan qurylys zattaryn saýdalaityn iri dúken ashsam degen josparym bar. Bul armanym ázirdiń ózinde birtindep iske asyp keledi», - deidi Didar.
Jetisai aýdany ákiminiń baspasóz qyzmeti
