Túrkistan oblysynda kámeletke tolmaǵan balalardy qaǵyp, oqiǵa ornynan qashyp ketken kúdikti ustaldy, dep habarlaidy "Ult aqparat".
Kúni keshe áleýmettik jelide 14 aqpanda Túrkistan oblysy Jetisai aýdanynda kámeletke tolmaǵan balalardyń qatysýymen jol-kólik oqiǵasy oryn alyp, oǵan kináli kúdiktiniń izdestirilip jatqany týraly aqpar taraǵan bolatyn.
Búgin jergilikti politsiia qyzmetkerleriniń tiianaqty jumysynyń nátijesinde kúdikti ustaldy.
Naqtyraq aitar bolsaq, 14 aqpanda Jetisai aýdandyq politsiia bólimine aýrýhanadan túrli dene jaraqatymen 3 birdei kámelet jasyna tolmaǵan balanyń jetkizilgeni týraly habarlama kelip túsken.
Oqiǵa ornyna jedel jetken politseiler sol kúni keshki saǵat 17:50 shamasynda Jetisai qalasyndaǵy S.Erýbaev kóshesi boiynda belgisiz avtokólik ońtústikten soltústik baǵytyna qarai júrip bara jatyp, 3 jasóspirim balany soǵyp ketip, jol apatyn jasaǵanyn anyqtady.
Oqiǵa saldarynan úsh bala da aýrýhanaǵa jetkizildi.
Iaǵni 16 jáne 13 jas shamasyndaǵy balalar túrli dene jaraqatymen emhanada em qabyldasa, nebary 4 jasar búldirshin jansaqtaý bólimine túsip, kóz jumdy.
Atalǵan jait Jetisai aýdandyq politsiia bóliminde eki birdei bappen, QR QK 345-baby jáne kúdiktiniń oqiǵa ornyn tastap ketkeni úshin QR QK 347-baby boiynsha tirkeldi.
Bul qylmysty jedel ashý maqsatynda aýdan politseileri kúdiktini anyqtaýǵa qatysty jedel izdestirý jumystaryn júrgizdi.
Oqiǵa ornyn tiianaqty teksergen tártip saqshylary sol orynnan belgisiz avtokóliktiń artqy jaryq shamdarynyń synyqtary men aina synyqtaryn aldy.
Bul zattar «Aýdi-100» markaly avtokóligine tiesili jáne kóliktiń túsi surǵylt qara bolýy yqtimal dep boljanyp, izdestirý jumystary joǵary deńgeide atqaryldy.
Nátijesinde oqiǵaǵa qatysty kúdikti retinde jasy qyryq shamasyndaǵy Jetisai qalasynyń jergilikti turǵyny quryqtaldy.
Politseilerdiń kólikke qatysty jasaǵan boljamy da rastalyp, kúdiktiniń «Aýdi 100» markaly avtokóligi bar ekeni anyqtaldy.
Qazirgi ýaqytta ustalǵan azamat qamaýda, tergeý amaldary júrgizilýde. Al kólik aiypturaqqa qoiyldy. Saraptama taǵaiyndaldy.
«Oqiǵa ornynan qandai jaǵdai bolsa da qashyp ketýge bolmaidy. Sonymen qatar jol erejesin muqiiat saqtaý mańyzdy» dep eskertedi politseiler.
