Túrkistan oblysynyń Jetisai aýdanynda egistik basynda jappai tóbeles bolyp, 12 adam jaraqat alǵan. Osy oqiǵaǵa qatysty eki adam qamaýǵa alyndy, dep habarlaidy "Ult aqparat".
Oblystyq PD baspasóz qyzmetiniń málimetinshe, jappai tóbelestiń videosy áleýmettik jelige taraǵan. Onda egistik basyndaǵy diqandar bir-birin taiaqtap jatqany kórinedi. Oqiǵany teksergen jetisailyq politseiler tóbelestiń 29 mamyr kúni bolǵanyn aitady.
Egistik alqabyna shuǵyl shyqqan tártip saqshylary adamdar arasyndaǵy tóbeles egistikke jiberiletin sýǵa talastan paida bolǵanyn anyqtaǵan. Tóbelesten keiin dárigerdiń kómegine 12 azamat júgingen. Olardyń beseýi Jetisai aýdandyq aýrýhanasyna jatqyzylyp, ózgeleri alǵashqy meditsinalyq kómekten keiin úilerine qaitarylǵan.
«Atalǵan jait QR QK-tiń 293-babymen tirkeldi. Qazirgi tańda turǵyndardyń alǵan dene jaraqattarynyń aýyrlyǵyn anyqtaý maqsatynda sot-meditsinalyq saraptama taǵaiyndaldy.Tártip saqshylary tekserý barysynda osy tóbeleske qatysqan 2 azamatty ustap, ýaqytsha ustaý izoliatoryna qamaýǵa aldy. Qazirgi ýaqytta atalǵan jait boiynsha barlyq tulǵalardy jáne kinálilerdi anyqtaýǵa baǵyttalǵan tergeý amaldary júrgizilýde. Oqiǵanyń tolyq mán-jaiy tekserilýde» delingen habarlamada.
