Jetisai aýdanynda ótken saltanatty sharaǵa Túrkistan oblysynyń ákimi Janseiit Túimebaev arnaiy qatysyp, jergilikti turǵyndardyń qýanyshyn bólisti.
Atap aitqanda, kógildir otynǵa qol jetkizgen aýdannyń Sh.Dildábekov aýyl okrýgine qarasty Dostyq, Baidala, Zerdeli aýyldary men Atameken aýyldyq okrýgine qarasty Tyńdala jáne Qoǵaly eldi mekenderi. Aimaq basshysy Dostyq aýylyndaǵy gaz torabyn iske qosý rásimine qatysyp, endigi kezekte 5 myńǵa jýyq halqy bar bes aýyl turǵyndarynyń kómir tasyp, kúl shyǵarmaitynyn jetkizdi.
«Qurmetti túrkistandyqtar! Qadirmendi Jetisai aýdanynyń turǵyndary! Búgin sizder men bizder kópten kútken úlken qýanyshtyń kýási bolǵaly otyrmyz. Iaǵni, búgin Túrkistan oblysyna qarasty Jetisai aýdanynda bes eldimekenniń turǵyndary tabiǵi gazǵa qol jetkizip otyr. Qazirgi tańda Jetisai aýdanynda 104 eldimekenniń 46-sy, iaǵni 22 096 abonent tabiǵi gazben qamtylsa, bul aýdandaǵy eldi mekenderdiń jalpy sanynyń 44,2 paiyzyn qurap otyr. Al abonent sany boiynsha 74,4 paiyzǵa jetti», - dedi Janseiit Qanseiituly.
Jalpy biyl Jetisai aýdanyndaǵy eldi mekenderdi gazdandyrý maqsatynda 5 nysannyń qurylysyna oblystyq biýdjetten 615,4 mln teńge qaralǵan bolatyn. Onyń ishinde 1 nysannyń qurylys-montaj jumystary 2018 jyldyń shilde aiynda aiaqtalsa, 3 eldi mekenniń qurylysy jyl sońyna deiin el igiligine tapsyrylady dep kútilýde.
Jetisai aýdanynyń damý kontseptsiiasyna sáikes 2019-2025 jyldary osy óńirdegi 104 eldi mekenniń bári derlik 100 paiyz gazben qamtylady degen jospar bar.
Jetisaiǵa jumys saparynda aimaq basshysy Jańaaýyl aýyldyq okrýgi Yntymaq eldimekenindegi Turar Rysqulov atyndaǵy 600 oryndyq jańa mekteptiń ashylý saltanatyna da qatysty. Buǵan deiin úsh aýysymda bilim berip kelgen orta mektep ujymyn búgingi qýanyshymen quttyqtaǵan oblys ákimi jańa, zamanaýi talapqa jaýap beretin eńseli de, keremet mekteptiń synyptaryn aralap kórdi. Ondaǵy shákirttermen tildesip, olardyń sabaqtaryn úzdik oqyp, elimizdiń úlgili azamattary bolýǵa shaqyrdy.
Odan soń, ákim Jetisai qalasyndaǵy «AIIG Kazakhstan» JShS-niń maqta zaýytynda boldy. Atalǵan zaýytta 660 adam jumys isteidi. Qýattylyǵy jylyna 40 myń tonna. 2013 jyly qurylǵan zaýytta maqta talshyǵy, tehnikalyq tuqym, lint, ýliýk daiyndalady. Jalpy aýmaǵy 5,6 gektardy quraidy. Munda óndirilgen ónimder negizinen elimizdiń barlyq aimaǵyna taratylady.
Oblys ákimi zaýyt jumysshylarymen kezdesip, aýdandaǵy «Ozat terimshi, «Eń úzdik kombainshy», «Eń úzdik terimshi», «Eń úzdik maqta zaýyty» nominatsiialarynyń iegerlerin marapattap, syi-siiapat tabystady.
Jalpy Jetisai aýdanynda maqta terý naýqanynyń aiaqtalýyna sanaýly kúnder qaldy. Qazirgi tańda aýdan boiynsha 48226,8 gektar maqta alqabynan 126 myń 192 tonna shitti maqta jinaldy. Aq altynnyń túsimdiligi ár gektarynan 26,2 tsentnerdi qurady.
