QR Ishki ister ministrligi Ákimshilik politsiia komiteti tóraǵasynyń orynbasary Serik Túsipov Qazaqstandaǵy jol qaýipsizdiginiń jaǵdaiy týraly aityp berdi, dep habarlaidy "Ult aqparat".
«Jol qaýipsizdigin qamtamasyz etý – ishki ister organdarynyń basty mindetteriniń biri. Jalpy eldegi jol qaýipsizdiginiń jai-kúii apattylyqtyń jekelegen kórsetkishterin tómendetýge yqpal etti. Respýblikada eń kóp jol apaty 2013 jyly tirkelgen edi, onda 23 359 jol-kólik oqiǵasy tirkelip, 3 037 adam qaza tapty jáne 30 myńǵa jýyq (29 872) jaraqat aldy», - dedi Serik Túsipov ministrlikte ótken onlain brifingide.
Sońǵy jeti jylda, 2013-2020 jyldary Ishki ister ministrligi men múddeli memlekettik organdar qabyldaǵan keshendi sharalar arqyly jol-kólik oqiǵasy sany eki esege nemese 42%-ǵa azaidy. Al qaza bolǵandar sany 34%-ǵa, jaraqat alǵandar – 40%-ǵa tómendegen.
2020 jyly pandemiiaǵa bailanysty karantin sharalary kezinde oblysaralyq tasymaldar shektelip, turǵyndardyń kólikpen júrýi azaiǵandyqtan, apat kórsetkishteri de azaidy: jol-kólik oqiǵasy – 19%-ǵa, qaza tapqandar – 17%-ǵa jáne jaralanǵandar – 20%-ǵa.
«Sonymen birge, jyl basynan beri qozǵalys qarqyny qaita óskenin, el avtoparkiniń tehnikalyq jaǵdaiyn, jol-kólik infraqurylymyn damytý jónindegi sharalardyń jetkiliksizdigin eskere otyryp, jekelegen apat kórsetkishteriniń ósýi baiqalady. Máselen, biylǵy úsh aida jol-kólik oqiǵasy sany 4%-ǵa (2 740-tan 2 621-ge deiin) jáne jaralylar sany 1%-ǵa (3 634-ten 3 605-ke deiin) tómendegen bolsa, qaza bolǵandar sany 12%-ǵa – 325-ten 363-ke deiin ósken», - deidi S. Túsipov.
