Atyraý oblysyndaǵy ejelgi Saraishyq qalasyn saqtap qalý úshin júrip jatqan Jaiyq jaǵasyn bekitý kezinde jumys alańynan adam súiekteri shyqty.
Aita ketelik, jeti han jerlengen delinetin kóne shahardy Jaiyq ózeniniń shaiyp bara jatqany belgili. Buny toqtatý úshin byltyr óńir basshysy Nurlan Noǵaev jergilikti qazynadan 1,5 milliard teńge bólingenin málimdegen edi.
Oblystyq tarixi-ólketaný mýzeiiniń basshysy Rashida Haripovanyń aitýynsha, jumys alańynan shyqqan súiekter arnaiy zertteýler júrgizilip syzbalary syzylyp alynǵannan keiin jinalyp, aýyl mańyndaǵy beiitke qaita jerlenip jatyr. Ol ejelde munda orys kazaktarynyń, noǵailardyń jáne ony altynshy ǵasyrdaǵy qazaqtardyń jerlengeni belgili bolǵanyn aitty. Súiekterdiń astynda Saraishyq qalasy ornalasqan.
Ol Jaiyq ózeniniń jaǵasyndaǵy apatty jaǵdaidaǵy qazba ornyn saqtap qalý maqsatyndaǵy arheologiialyq qazba jumysynyń biyldan bastap qolǵa alynǵandyǵyn jáne 2020 jylǵa deiin jalǵasatynyn da habarlady. Aiaqtalǵan qazba oryndaryn restavratsiialaý bastalǵan. Jalpy qazba jumystaryna tarih ǵylymdarynyń doktory, arheolog Zeinolla Samashev ǵylymi jetekshilik etedi.
Al, jaǵany bekitý jumysyn júrgizip jatqan merdiger kompaniianyń ókili Asqar Tólenov qurylys 2018 jyldyń basynda aiaqtalady dep josparlanǵanyn aitty.
Buǵan deiin Mádeniet jáne sport ministrligi shahardy qalpyna keltirý úshin 100 million teńge bóletinin habarlady. Qazirde qalanyń ornyn týristik ortalyqqa ainaldyrý kózdelip otyr.
Aita ketelik, Saraishyq Atyraý qalasynan 45 shaqyrym jerde ornalasqan. Altyn ordanyń saiasi, ekonomikalyq ortalyqtarynyń biri bolǵan qala Qasym hannyń tusynda Qazaq handyǵynyń astanasy atandy. Jibek jolynyń boiynda turǵan munda, tarihshylardyń aitýynsha, 7 han jerlengen. Olar: Móńke, Toqtaǵý, Jánibek, Ámir Oqas, Qasym han, Shih Mamai jáne Júsip handar. Qalashyq "Bolashaqqa baǵdar: Rýhani jańǵyrý" baǵdarlamasy aiasyndaǵy «Qazaqstannyń kieli jerler geografiiasy» tizimine engen.
