Jergilikti atqarýshy organdar múgedekterdiń áleýmettik nysandarǵa erkin kirip-shyǵýyn qamtamasyz etý jumystaryn kúsheitýi tiis. Bul týraly búgin QR Eńbek jáne halyqty áleýmettik qorǵaý vitse-ministri Aqmádi Sarbasov aitty, dep habarlaidy QazAqparat tilshisi.
«2019 jyly memlekettik baqylaý kúsheitilip, biz úsh jyldyq kezeńmen salystyrǵanda tekserý sanyn 3 ese arttyrdyq. Ótken jyly múgedekterge áleýmettik jáne kólik nysandary infraqurylymynyń qoljetimdiliginiń qamtamasyz etilmeýine qatysty 1300 tekserý júrgizildi. Nátijesinde 1091 sýbektige anyqtalǵan zańbuzýshylyqtardy joiý týraly uiǵarym men qorytyndy berildi», - dedi vitse-ministr.
Onyń atap ótýinshe, atalǵan sýbektilerdiń 212-sine jalpy somasy 46 mln teńgeni quraityn ákimshilik aiyppul salynǵan.
«Bul jaýapkershilik sharalary ekendigin túsinemiz. Sonymen qatar ákimshilik aiyppuldar jemisin de beredi. Biraq, bul saraptama jergilikti atqarýshy organdardyń osy baǵyttaǵy jumysty kúsheitýi tiis ekenin kórsetip otyr. Quramyna sáýlet jáne qala qurylysy bólimderi, qoǵamdyq keńes músheleri kiretin jumys toptary bar. Alaida, ókinishke qarai barlyq sharýa jumyspen qamtý bólimine júktelip otyr. Olar óz quzireti sheginde júktelgen sharalardy júzege asyrýǵa qaýqarly», - dedi Aqmádi Sarbasov.
