Jergilikti ókildi organdar qyzmetiniń formatyn túbegeili jańǵyrtý qajet. Bul týraly Qazaqstan máslihattarynyń 25 jyldyǵyna arnalǵan respýblikalyq konferentsiiada Almaty oblystyq máslihatynyń hatshysy Sultan Dúisenbinov aitty, dep habarlaidy "Ult aqparat".
«Osy jyldyń 24-25 qarashasynda Parlament Májilisindegi «Nur Otan» partiiasy fraktsiiasy músheleriniń jáne máslihat hatshylarynyń qatysýymen ótken óńirlik filialdar ókilderi keńesinde Elbasy Nursultan Nazarbaev árbir ákim men máslihattardyń, fraktsiia depýtattarynyń partiialyq jaýapkershiligin túbegeli kúsheitý qajettigin, qazirgi ýaqytta máslihattyń óńirlerdiń damýyna yqpal ete alatyn tetikteri bar ekenin jáne olardy qoldaný kerektigin atap ótti. Partiia tóraǵasynyń osy sózin basshylyqqa ala otyryp, jergilikti ókildi organdar qyzmetiniń formatyn túbegeili jańǵyrtý qajet dep esepteimin», - dedi ol.
S.Dúisenbinov máslihat depýtattary jurtshylyqty tolǵandyryp otyrǵan ózekti máselelerdi memlekettik organdar nazaryna jetkizý jumysyn jandandyryp, olardy sheshýdiń naqty joldaryn usynýǵa, sonymen birge ashyq bolýǵa, halyqpen jiirek kezdesýge, BAQ-tardyń, áleýmettik jeliler men messendjer múmkindikterin tolyq qoldanýǵa tiis ekenin aitty.
«Jalpy alǵanda, máslihattar óz tiimdiligin arttyryp, azamattyq dialogtyń damýyna baǵyttalǵan adamdardyń suranystaryna sergektikpen qaraityn, jergilikti problemalar talqylanatyn jáne óz qyzmetinde qoǵam birligin nyǵaitýǵa yqpal etetin ortalyqqa ainalýy tiisti»,- dedi oblystyq máslihat hatshysy.
