Prezident Qasym-Jomart Toqaev Ulttyq qoǵamdyq senim keńesiniń besinshi otyrysynda bes máselege toqtaldy. Bul týraly Qoǵam qairatkeri, QR Prezidenti janyndaǵy Ulttyq qoǵamdyq senim keńesiniń múshesi Aýyt Muqibek aitty, dep habarlaidy QazAqparat.
«Erekshe toqtalyp aitaiyn degenim, uzaqtan beri daý bolyp, halyqtyń kóńilin kúpti qylyp kele jatqan jerge bailanysty máselege núkte qoiyldy. «Sheteldikterge jáne sheteldik zańdy tulǵalarǵa aýyl sharýashylyǵy jerlerin satýǵa, jalǵa berýge zań júzinde birjola tyiym salýdy tapsyramyn», -dedi Prezident. Jáne bul tapsyrmany tez arada oryndaýdy uiǵardy. Jalpy, jurttyń kútkeni de osy edi. Bul Qasym-Jomart Toqaevtyń qoly arqyly qazaq tarihyna altyn árippen jazylǵan sheshim boldy», - deidi Aýyt Muqibek.
Sonymen qatar, ol Memleket basshysynyń bul sheshimin tarihi oqiǵa retinde baǵalaitynyn jetkizdi.
«Taǵy bir riza bolǵanym, Qasym-Jomart Kemeluly toqtalyp, tapsyrma bergen bes máseleniń beseýi de qarapaiym halyqtyń ómiri men turmysyna qatysty bolǵany. Mysaly,Turǵyn-úi jáne ekonomika saiasatyn jetildirý. Endigi ýaqytta aýyldy jerlerge turǵyn úi salǵan kompaniialardyń jalpy shyǵynynyń jartysyn úkimet tólep beretin boldy. Bul da keremet bastama der edim. Aýyl halqynyń qalaǵa aǵylýyn toqtatýǵa, aýyl sharýashylyǵyn damytýǵa óte paidaly sheshim», - deidi ol.
Qoǵam qairatkeri, keńeste múmkindigi shekteýli adamdardyń da máselesi nazardan tys qalmaǵanyn atap ótti.
«Prezident múgedektikti anyqtaý rásimderin túbegeili jeńildetýdi tapsyrdy. Shyny kerek, «Nur Otan» partiiasyna múgedektik mártebe alýdyń qiyndyǵy týraly azamattar kóp aryzdanady. Mine, Qudaiǵa shúkir, bul másele de óz sheshimin tapty. Qysqartyp aitqanda, óz basym Prezidenttiń búgingi sheshimderi men tapsyrmalaryna qatty riza boldym», - dep túiindedi Ulttyq qoǵamdyq senim keńesiniń múshesi.
