Jerdiń sheteldikterge berilmeitini jóninde naqty sheshim qabyldandy. Bul týraly QR Aýyl sharýashylyǵy ministrliginiń jer reformasy jónindegi komissiia otyrysynda QR Premer-Ministriniń orynbasary Eraly Toǵjanov aitty, dep habarlaidy QazAqparat.
«25 aqpanda Ulttyq qoǵamdyq senim keńesiniń besinshi otyrysynda QR Prezidenti Qasym-Jomart Toqaevtyń aýyl sharýashylyǵy jerlerin sheteldikterge jáne sheteldik kompaniialarǵa, sheteldik úlesi bar qazaqstandyq kompaniialarǵa, azamattyǵy joq adamdarǵa, halyqaralyq qatysy bar ǵylymi ortalyqtarǵa, sondai-aq qandastarǵa berýge tolyq tyiym salý týraly saiasi sheshimi arnaiy zań jobasy retinde Parlamenttiń qaraýyna 12 naýryzda engizildi. Zań jobasynyń birinshi oqylymy Májiliste 7 sáýirde ótedi», - deidi QR Premer-Ministriniń orynbasary Eraly Toǵjanov.
Onyń aitýynsha, kópshilik arasynda, ásirese áleýmettik jelilerde áli de jekelegen túsinispeýshilikter taralyp júr.
«Jalǵan qaýesetti ádeii taratýshylar da joq emes ekenin aitýymyz kerek. Sondyqtan taǵy bir naqtylap aitamyn: jerdiń sheteldikterge berilmeitini jóninde naqty sheshim qabyldandy. Memleket basshysy Qasym-Jomart Kemeluly qoǵam tarapynan kóterilip otyrǵan negizgi máseleler boiynsha túiindi sheshimin aityp, núktesin qoidy. Qazirgi tańda komissiia aldynda aýyl sharýashylyǵy salasyndaǵy jer qatynastaryn damytý máselesi boiynsha usynymdar ázirleý mindeti tur. Endi osy máselelerdi jan-jaqty aqyldasqanymyz durys», - dedi ol.
