Qazaqstanda jaiylym tapshylyǵyn sheshýge yqpal etetin normalar zańnamaǵa engiziledi. Bul týraly Parlament Májilisiniń tóraǵasy Nurlan Nyǵmatýlin málim etti, dep habarlaidy "Ult aqparat".
Aita keteiik, búgin palatanyń jalpy otyrysynda «Qazaqstan Respýblikasynyń keibir zańnamalyq aktilerine jer qatynastaryn damytý máseleleri boiynsha ózgerister men tolyqtyrýlar engizý týraly» zań jobasy birinshi oqylymda maquldandy.
«Bul qujat Memleket basshysy Qasym-Jomart Toqaevtyń tikelei tapsyrmasymen ázirlendi. Osy zań jobasy boiynsha eń aldymen halqymyzdyń nazarynda júrgen óte mańyzdy jer máselesi boiynsha naqty sheshim qabyldandy. Eń bastysy, aýyl sharýashylyǵy maqsatyndaǵy jerlerdi jalǵa berý zańmen bekitildi. Osy máselege qatysty qoǵamda ártúrli pikirler men oilar aityldy. Endi jerdi jekemenshikke berý 5 jylǵa toqtatylady. Jalpy, zań jobasy jeke mal jaiý úshin qajetti jaiylym tapshylyǵyn sheshýge de yqpal etedi. Sonymen birge jerdi paidalaný jáne qorǵaýǵa baqylaýdy kúsheitedi. Jer ýchaskeleri boiynsha aqparattyń ashyqtyǵy da artatyn bolady», - dedi N. Nyǵmatýlin.
Zań jobasynyń negizgi ózgeristeri men tolyqtyrýlary:
- qazaqstandyqtarǵa jáne qazaqstandyq zańdy tulǵalarǵa aýyl sharýashylyǵy maqsatyndaǵy jerlerdi 49 jylǵa deiingi merzimge jalǵa berý;
- kelesi, jalǵa alý merzimi aiaqtalǵan kezde ony jańa merzimge uzartý quqyǵyn berý;
- memleketten satyp almai, jer paidalanýshylar arasynda aýyl sharýashylyǵy maqsatyndaǵy jerge jaldaý quqyǵyn ielikten shyǵarý. Bul rette, olardy paidalaný merzimi keminde 5 jyl, sondai-aq jer qatynastary organdaryn habarlaý mindetti shart bolyp sanalady;
- Jer resýrstaryn basqarý komitetine jerdi paidalaný men qorǵaýdy memlekettik baqylaý fýnktsiialaryn ákimdikterden qaitarý;
- aýyl sharýashylyǵy jerleriniń nysanaly maqsatyn «baǵbandyq» jáne «saiajai qurylysyna» ózgertýge tyiym salý;
- halyqtyń muqtajyn qanaǵattandyrý maqsatynda, jergilikti jaǵdailardy eskere otyryp, jaiylymdardy basqarý jónindegi josparlarda, qajetti jaiylym alqabynyń shekarasyn aiqyndaý;
- aýyl sharýashylyǵy maqsatyndaǵy jerlerdi jeke menshikke berýge moratoriidiń qoldanylý merzimin 2026 jylǵy 31 jeltoqsanǵa deiin uzartý.
