Áleýetti menshik ielerine qoiylatyn topyraq sapasyn, ósimdik jamylǵysyn saqtaý, jaiylymdardyń tozýyn boldyrmaý, aýyspaly egisterdi saqtaý jáne jerdi utymdy paidalaný tiimdiligin arttyrý boiynsha basqa da qarsy mindettemeler qoldanystaǵy konkýrstardaǵy talaptarda kúsheitiletin bolady.
Mundai tapsyrmany 2024 jylǵy 3 sáýirde ótken paidalanylmai jatqan jáne zańnamany buza otyryp berilgen jerlerdi alyp qoiý máseleleri jónindegi komissiianyń kezekti otyrysynyń qorytyndysynda Premer-Ministrdiń orynbasary Serik Jumanǵarin berdi.
Jer resýrstaryn basqarý komitetiniń tóraǵasy Murat Temirjanovtyń aitýynsha, 2024 jyldyń basynan beri aýyl sharýashylyǵy maqsatyndaǵy 391,2 myń gektar, al 2022-2024 jyldary barlyǵy 10,4 mln gektar jer memleket menshigine qaitarylǵan. Onyń 3,7 mln ga jeri jergilikti halyqqa qaita bólindi (jalpy maqsattaǵy mal jaiýǵa – 1,72 mln ga, konkýrstyq negizde bólip paidalanýǵa – 1,69 mln ga).
"Aita ketý kerek, aýyl sharýashylyǵy jerleriniń 4,4 mln ga nemese 2022 jyldan bastap el boiynsha qaitarylǵan barlyq jerdiń 44%-y buryn 204 iri kásipkerlik sýbektileriniń qolynda bolǵan", — dep habarlady Murat Temirjanov.
Jaiylym tapshylyǵyn azaitý úshin ákimdikterge, jalpy paidalanýǵa, mal jaiý úshin 562,1 myń ga jaiylymdyq jer bekitilip berilgen, 65,1 myń ga jaiylym jer paidalanýǵa konkýrstyq negizde berilgen, 746,6 myń ga rezervke qoiylǵan. Eldi mekender shegine 97,3 myń ga jaiylymdyq jer engizildi.
"Búginde bizdiń negizgi mindetimiz – jerdi qaitarý ǵana emes, tiimdi paidalaný jáne jer paidalanýshylardy baqylaý. Alynǵan jerlerdi paidalaný men jaqsartý úshin jaýapkershilikti kúsheitý qajet. Baiqaý sharttaryn biznes-qoǵamdastyqpen, ákimdiktermen jáne basqa da múddeli qatysýshylarmen talqylaǵan jón. Topyraqty, ósimdik quramyn saqtaý, zamanaýi tehnologiialardy paidalaný boiynsha qarsy mindettemeler qoiý kerek. Ol úshin jerdi bólýdiń jańa erejeleri men printsipterin ázirleý qajet", — dedi Serik Jumanǵarin.
Pilottyq rejimde Memlekettik jer kadastrynyń jáne tehnikalyq zertteýdiń avtomattandyrylǵan aqparattyq júiesi 2.0 jer paidalanýshynyń eseptik jazbasy quryldy. Onda topyraqtyń (qarashirik, jyljymaly mineraldar) jáne ósimdik jamylǵysynyń jai-kúiiniń joǵary sapaly agrohimiialyq sipattamasy bar jer ýchaskesi týraly aqparat bolady. Ony utymdy paidalaný kriteriilerine sáikestigin qamtamasyz etý úshin bes jyl saiyn ýchaskeni zertteý jumystary júrgiziletin bolady. Eger ónimdiliktiń nasharlaýy anyqtalsa, tiisti sharalar qabyldanady.
