Jerdi alyp, ony ózge bir tanysyna jalǵa berip qoiýdy toqtatý qajet. Mundai pikirdi Qazaqstannyń Eńbek eri, jer reformasy boiynsha respýblikalyq komissiiannyń múshesi Sairan Buqanov bildirdi, dep habarlaidy QazAqparat.
«Prezident usynǵan jer reformasy jónindegi zań jobasyn tolyq qoldaimyn. Ata-babalarymyz qan-maidanda júrip, osy jerdi bizge aman etip qaldyrdy. Al Elbasy N.Á.Nazarbaev shekaramyzdy shegendedi. Endi osy jerimizdi durys paidalanýymyz kerek. Qazir azamattar jerdi alady, biraq ony tiimdi paidalanbaidy.
Barlyǵyn birdei jazǵyrýǵa bolmaidy. Keibireýlerdiń alqaptary durys ónim bermei jatady. Ony da eskergen mańyzdy. Osynyń barlyǵyn saraptai kele, respýblikalyq jer reformasy jónindegi komissiia músheleri jerdiń durys igerilýin baqylaityn agenttik qurý qajet dep esepteidi. Ol tikelei Memleket basshysyna baǵynýy qajet. Agenttik jerdi paidalanýdy qadaǵalap, olqylyqtar tapsa, onda ony memleketke qaitarýy tiis bolady. Qazir jerdi ákimder beredi jáne ózderi baqylaýda ustaidy. Jerdi alǵan azamat alqabyn durys igere almasa, onda ony qaitaryp alý protsesi búginde óte kúrdeli.
Osy oraida taǵy bir ózekti máselege toqtalsam. Jer alyp, ony ózge bir tanysyna jalǵa berip qoiatyndarǵa shek qoiý qajet. Iaǵni, qosalqy jaldamamen ainalysý. Bul kóleńkeli biznestiń bir túri. Osy árekettiń jolyn kesip, jerdi tiimdi ári ońtaily paidalanatyn adamdarǵa bergenimiz jón», - dep atap ótti Sairan Balkenuly.
