Búgin QR Aýyl sharýashylyǵy ministrliginde jer zańnamasyn jetildirý maqsatynda qurylǵan jumys tobynyń otyrysy ótti. Jumys tobyna basshylyq etken QR AShM vitse-ministri Erlan Nysanbaev «QR keibir zańnamalyq aktilerine jer qatynastaryn retteý máseleleri boiynsha ózgerister men tolyqtyrýlar engizý týraly» QR Zań jobasyn jáne aýyl sharýashylyǵy maqsatyndaǵy jerlerdi jalǵa berý institýtyn jetildirý jónindegi jumystarmen tanystyrdy, dep habarlaidy BNews.kz tilshisi.
Vitse-ministr sóz basynda sheteldikterge jerdi jalǵa berýge 2021 jylǵa deiin moratorii jariialanǵandyqtan bul másele qaralmaitynyn atap ótti. Onyń aitýynsha, jalpy respýblika boiynsha 31,3 myń ga jerdi sheteldikter jalǵa alyp otyr. Jalpy, el aýmaǵynda 100835,4 myń ga aýyl sharýashylyǵy maqsatyndaǵy jer bar jáne mundaǵy sheteldik jer paidalanýshylardyń úles salmaǵy – 0,03 paiyz.
«Zań jobasyn ázirleý barysynda biz úshin barlyq protsedýranyń ashyq túrde ótkeni mańyzdy. Qazaqstandyqtarǵa jalǵa beriletin jer ýchaskeleriniń tizimi konkýrs aiaqtalǵanǵa deiin ashyq bolýy kerek. Ol halyq tarapynan narazylyq bolmaýy úshin qajet. Komissiia quramyndaǵy qoǵamdyq uiymdardyń úlesi 50 paiyzdan kem bolmaidy. Bul konkýrs ótkizetinder arasyndaǵy jemqorlyqqa jol bermeidi», - dedi ol.
Erlan Nysanbaev biryńǵai tiptik kelisimshart ázirlenip, jer tiimdi túrde paidalanylýy kerek ekenin aitty. Eger jer sapasy nasharlaǵan jaǵdaida, jalǵa berilgen jer ýchaskelerin qaitaryp alý tetikteri jasalady. Ákimdikter jerdiń maqsatqa sai paidalanylýyna jaýap beredi. Jer asa tiimdi biznes-jobalarǵa da jalǵa berilmek.
Vitse-ministrdiń aitýynsha, zań jobasy kópshilik talqylaýyna usynylady. Ony QR Parlamenti Májilisine qarasha aiynyń sońynda engizý josparlanǵan.
Jumys toby QR Premer-ministriniń orynbasary – QR Aýyl sharýashylyǵy ministri Asqar Myrzahmetovtyń 2016 jylǵy 21 qyrkúiektegi N396 buiryǵymen qurylǵan. Top quramyna 39 múshe: múddeli ortalyq memlekettik organdardyń ókilderi, oblys ákimderiniń orynbasarlary, oblystardyń, Almaty jáne Astana qalalarynyń jergilikti atqarýshy organdarynyń, Ulttyq kásipkerler palatasynyń ókilderi, QR Ǵylym akademiiasynyń ǵalymdary kirdi.
