Jer týraly zańnyń qabyldanýy sheteldikterdiń aýylsharýashylyq jerlerin satyp alýy men jalǵa alýy máselesine túbegeili núkte qoiady. Bul pikirdi QR Prezidentiniń kómekshisi Erlan Qarin óziniń Telegram kanalynda jariialady, dep habarlaidy "Ult aqparat".
«Májilistiń jalpy otyrysynda ekinshi oqylymda aýyl sharýashylyǵy maqsatyndaǵy jerlerdi sheteldik azamattar men sheteldik qatysýy bar kásiporyndarǵa satýǵa jáne jalǵa berýge tyiym salýdy kózdeitin jer týraly zań qabyldandy. Bul zańdy ázirleýdi Qasym-Jomart Toqaev 25 aqpanda Ulttyq qoǵamdyq senim keńesiniń V otyrysynda usynyp, osy qujatty Prezidenttiń zań shyǵarý bastamasy aiasynda daiyndaýdy tapsyrdy. Al 12 naýryzda Zań jobasy Prezidenttiń arnaiy joldaýymen Májilistiń qaraýyna engizildi», - dep jazdy E. Qarin óziniń Telegram-paraqshasynda.
Atalǵan zań jobasy boiynsha jumys tobynyń 3 otyrysy jáne Agrarlyq máseleler komitetiniń 2 keńeitilgen otyrysy ótti. 7 sáýirde jalpy otyrysta depýtattar qujatty birinshi oqylymda qarady.
«Búgin zań jobasyn Májilis depýtattary maquldady jáne endi Senattyń qaraýyna jiberiledi. Osylaisha zań jobasy qarastyrýdyń barlyq negizgi kezeńderinen ótip keledi. Jer týraly zańnyń qabyldanýy ótkir pikirtalastar týdyrǵan sheteldikterdiń aýylsharýashylyq jerlerin satyp alýy men jalǵa alýy máselesine túbegeili núkte qoiady, bul taqyryp boiynsha daýlar men túrli alypsatarlyqtardy toqtatýǵa múmkindik beredi», - dedi Erlan Qarin.
