Jer reformasy jónindegi zań jobasy maýsymda Májilis qaraýyna engiziledi. Bul jaiynda QR Premer-Ministri Asqar Maminniń Májilis depýtattarynyń saýalyna berilgen jaýabynda aityldy, – dep habarlaidy «Ult aqparat».
«Ózderińiz biletindei, aǵymdaǵy jylǵy 31 jeltoqsanda Jer kodeksiniń keibir normalaryna engizilgen moratoriidiń merzimi aiaqtalady. Bul rette, moratorii engizilgen normalardyń odan ári qoldanysyn aiqyndaý maqsatynda tiisti taldaý jumystary júrgizildi. Nátijesi boiynsha osy máselelerdi retteýge baǵyttalǵan tiisti zań jobasyn josparly túrde ázirleý Qazaqstan Respýblikasy Úkimetiniń zań jobalaý jumystarynyń 2021 jylǵa arnalǵan josparyna engizildi», - dedi Asqar Mamin.
Onyń atap ótýinshe, qazirgi ýaqytta atalǵan zań jobasyna engiziletin normalardy qalyptastyrý maqsatynda jáne Memleket basshysynyń tapsyrmasyna sáikes jer reformasy jóninde komissiiany qurý, sondai-aq, ázirlenetin zań jobasynyń normalaryn qoǵammen talqylaý sharalaryn josparlaý jumystary júrgizilip jatyr.
«Atalǵan zań jobasy aiasynda sizderdiń sheteldik kompaniialar men azamattaryna jerdi satýǵa, sondai-aq, Qazaqstanmen shekaralas shet memleketter men olardyń azamattaryna jerdi jalǵa berýge tyiym salý týraly usynystaryńyz jan-jaqty qaralatyn bolady. Kórsetilgen jospar boiynsha zań jobasyn Parlament Májilisine engizý osy jylǵy maýsym aiynda josparlanǵanyn habarlaimyz»,- dedi Úkimet basshysy.
