QR Premer-Ministriniń orynbasary Eraly Toǵjanov Jer reformasy jónindegi komissiianyń tórtinshi otyrysyn qorytyndylady, dep habarlaidy QazAqparat.
Eraly Toǵjanov eki jumys toby engizgen usynystar boiynsha naqty sheshim qabyldaýdy surady jáne daýysqa saldy.
«Birinshiden, qazaqstandyqtarǵa jalǵa berýdi jańa merzimge uzartýǵa basymdyq quqyǵymen aýyl sharýashylyǵy jerlerin 49 jylǵa deiin uzaqmerzimdi jalǵa alý múmkindigin berý boiynsha tiisti zań normalaryna ózgerister men tolyqtyrýlar engizý usynylsyn.
Ekinshi, qazaqstandyqtarǵa aýyl sharýashylyǵy jerlerin jaldaý quqyǵyn memleketten satyp almai ielikten shyǵarý múmkindigin berý boiynsha normalaryn saqtap, tiisti zań aktilerine ózgerister men tolyqtyrýlar engizý usynylsyn.
Úshinshiden, QR Úkimetine eldi mekender ainalasynda jaiylymdar tapshylyǵy máseleleri boiynsha taldaý júrgizip, olardyń jetispeýshiligi problemalaryn sheshý usynylsyn.
Tórtinshiden, Jer kodeksiniń 50-babynyń 4-tarmaǵyndaǵy aýyl sharýashylyǵy maqsatyndaǵy jer ýchaskeleriniń shekti mólsherin belgileý normalaryn qarastyrýǵa bailanysty latifýndisterdi boldyrmaý týraly usynys. Bul máseleniń zańnamada sheshimi bar bolǵandyqtan komissiia qaraýynan alyp tastaýǵa usynys engizildi.
Besinshi, memlekettik organdardyń sheshimi boiynsha, ákimshilik shekaralar ózgergen jaǵdaida jeke jáne zańdy tulǵalarǵa jer ýchaskelerin sáikestendirý qujattaryn qaita daiyndaý úshin biýdjet qarajatyn kózdeitin normany zańnamalyq túrde bekitý usynylsyn.
Altynshy, aýyl sharýashylyǵy jerlerin sýbarendaǵa berý qoldanystaǵy zańnamada qarastyrylmaǵanyna bailanysty, bul suraq komissiianyń kún tártibinen alynsyn.
Bir apta sheńberinde jumys toptarynda osy máseleler talqylandy, oǵan bárińiz atsalystyńyzdar. Soǵan bailanysty sizderdiń kelisimderińiz boiynsha búgin osy máseleler komissiia otyrysyna shyǵaryldy. Sondyqtan, daýys berýge bárińizdi shaqyramyn», - dedi E. Toǵjanov.
Komissiia otyrsynda múshelerdiń kópshiligi daýys berdi, qarsy eshkim bolmady jáne tórt adam qalys qaldy.
«Sheshim qabyldandy. Aldymen bárińizge rahmet aitqym kelip otyr. Ashyǵyn aitqanda, búgin úlken mańyzdy sheshim qabyldandy. Búgingi qabyldanǵan sheshim jerdi ekonomikalyq ainalymǵa engizýge tolyqtai múmkindik berip otyr dep oilaimyn. Sony qoldaǵan, túsingen azamattar daýys berip qoldap otyr. Sondyqtan, elge, halyqqa kerek sheshimmen quttyqtaýǵa ruqsat etińizder», - dep qorytyndylady Eraly Toǵjanov.
