Jer reformasy jónindegi komissiia otyrysynda aýyl sharýashylyǵy jerlerin muraǵa berý men 49 jylǵa deiin jaldaý merzimin saqtaý talqylanyp jatyr, dep habarlaidy QazAqparat.
«Ekonomikalyq jumys tobynyń úshinshi otyrysyna 33 adamnyń 26-sy qatysty. Kún tártibinde 5 másele qaraldy. Birinshi másele – aýyl sharýashylyǵy jerlerin muraǵa berý múmkindigin qamtamasyz ete otyryp, olardy 49 jylǵa deiin jaldaý merzimin saqtaý. Talqylaýdyń qorytyndysy – aýyl sharýashylyǵy jerlerin 49 jylǵa deiin jalǵa berýdi qaldyrýdy jumys toby músheleriniń kópshiligi qoldady. Sebebi, jerdi 49 jylǵa deiin jalǵa berý merzimi Qazaqstanda alǵash ret 1995 jyly Jer týraly zańǵa sáikes qabyldanǵan. Sodan beri 26 jyl ótti. Bul shart aýyl sharýashylyǵy jerlerin paidalanýdyń júiesin qalyptastyrdy», - dedi Ekonomikalyq jumys tobynyń basshysy Kúrishbaev Aýyl sharýashylyǵy ministrliginde ótken Jer reformasy jónindegi komissiia otyrysynda.
Jumys tobyna qatysqan beligil aýyl sharýashylyǵy mamandary, iri aýyl sharýashylyǵy kásiporyndarynyń basshylary osy merzimdi aýyl sharýashylyǵynyń tiimdi jumys isteýdiń negizi dep qoldap otyr.
«Halyqaralyq tájiribege kelsek, álemniń kóptegen elderinde, onyń ishinde kórshilerimizde – Resei, Ózbekstan, Ýkraina jáne t.b. elderde aýyl sharýashylyǵy jerlerin jalǵa 49-50 jylǵa beriledi. Osy suraqtyń kelesi bóligi – jalǵa alý quqyǵyn muraǵa qaldyrý týraly usynys. Bul másele qoldanystaǵy Jer kodeksiniń 40-babymen retteledi. QR Konstitýtsiiasyna sáikes, muragerlik quqyǵyna zańmen kepildik beriledi jáne ol shektelmeýi tiis. Naqtylap aitsaq, muragerlik múmkindigi jerdi jalǵa bergen merzimi sheginde ǵana iske asady. Bul usynysty qoldaǵandar – 25 adam, qarsy bolǵan – 1 adam», - dedi Aqylbek Kúrishbaev.
