Senat tóraǵasy Máýlen Áshimbaev qazaqstandyqtardy Jeńis kúnimen quttyqtady, - dep habarlaidy «Ult aqparat».
«Barshańyzdy Jeńistiń 75 jyldyǵymen quttyqtaimyn! Bul – órshil rýh pen óshpes erliktiń merekesi. Jeńis kúni bekem birliktiń jáne eren eńbektiń jarqyn simvoly sanalady. Biz úshin aitýly meiramnyń mańyzy airyqsha zor. Elimizde soǵys oty sharpymaǵan áýlet joq. Qan maidanǵa attanǵan qazaqstandyqtardyń jartysy elge oralmady. Sol kezeńde 500-den astam otandasymyz Keńes odaǵynyń batyry atanyp, qaisarlyq pen janqiiarlyqtyń ozyq úlgisin kórsetti. Tyl eńbekkerleri de Uly Jeńisti jaqyndatýǵa ólsheýsiz úles qosty. Sondyqtan biz árdaiym ardagerlerimizdi ardaqtap, Otan úshin opat bolǵan erlerdiń rýhyna taǵzym etemiz», - dep jazdy Máýlen Áshimbaev Facebook paraqshasyna.
Taiaýda Memleket basshysy ardagerlerdiń, eń aldymen Ekinshi dúniejúzi soǵysyna qatysýshylardyń áleýmettik qorǵalýyn qamtamasyz etetin jańa zańǵa qol qoidy.
«Bul – búgingi beibit ómirimizge jol ashqan aǵa býynǵa kórsetilgen erekshe qurmet. Biz ákelerimiz ben atalarymyzdyń jankeshti erligin eshqashan umytpaimyz. Qazirgidei kúrdeli kezeńde de eshbir ardager eleýsiz qalǵan joq. Merekemen quttyqtai otyryp, maidangerlerimizge zor densaýlyq jáne baq-bereke tileimin», - dep túiindedi sózin Senat spikeri.
Aita keteiik, búgin qazaqstandyqtar Ekinshi dúniejúzilik soǵystaǵy Jeńistiń 75 jyldyǵyn toilap jatyr.
