Qazaqstanda Uly Otan soǵysynyń ardagerlerine beriletin járdemaqy basqa elderge qaraǵanda áldeqaida joǵary, - dep habarlaidy Tengrinews.kz.
Qazaqstanda UOS ardagerlerine áleýmettik tólem jergilikti biýdjetten qarastyrylyp jatyr. Sondyqtan ár aimaq jyl saiynǵy merekelik járdemaqylardyń qansha bolatynyn ózderi sheshedi. Alaida biyl Prezident Qasym-Jomart Toqaev barlyq óńirdegi ardagerlerge kem degende million teńgeden tóleýdi tapsyrdy. Qazir Qazaqstanda Uly Otan soǵysyna qatysqan 387 ardager turady.
Qazaqstanda bir adamǵa tólenetin birjolǵy tólemniń mólsheri TMD-nyń basqa elderine qaraǵanda áldeqaida joǵary bolyp shyqty.
Qazaqstanda Ulttyq banktiń 5 mamyrdaǵy baǵamy boiynsha járdemaqy mólsheri - 2 289 dollar.
Aita keteiik, jeńildikteri boiynsha UOS ardagerlerine teńestirilgen ardagerlerge az mólsherde tólemder tólenedi. Olar - UOS kezinde qyzmet etken áskeri qyzmetshiler, Leningrad qalasynda blokada kezinde jumys istegen fashistik Germaniiaǵa qarsy urys qimyldaryna qatysqandar, kontslagerlerdiń kámeletke tolmaǵan tutqyndary, jaralanyp, múgedek bolyp qalǵan áskeri qyzmetshiler. Sonymen qatar, tyl eńbekkerleri de járdemaqy alady.
Resei
"Vedomosti" saitynyń málimetinshe, Reseidegi Uly Otan soǵysynyń ardagerleri Jeńis kúnine 10 myń rýbl kóleminde jyl saiynǵy járdemaqy alady. Bul - shamamen 150 dollar. Aita keteiik, byltyr Jeńistiń 75 jyldyq mereitoiyna orai ardagerlerge beriletin járdemaqy 5 ese kóp boldy, iaǵni 50 myń rýbl.
Reseide 20 320 ardager turady.
Belarýs memleketi
BelTA-nyń málimetinshe, biyl Uly Otan soǵysynyń ardagerlerine 1800 belarýs rýbli mólsherinde beriledi. Bul - 535 dollar. Dál osyndai járdemaqy Uly Otan soǵysynyń múgedekteri men qatysýshylaryna, Otandy qorǵaý jónindegi soǵys qimyldaryna qatysqan adamdarǵa, 1943-1945 jyldary nemis okkýpatsiiasynan bosatylǵannan keiin aýmaqtar men nysandardaǵy minany joiýǵa arnaiy qurylymdarǵa qatysqan adamdarǵa tólenedi.
Ózbekstan
Regnum saitynyń aqparaty boiynsha, Ózbekstandaǵy Uly Otan soǵysynyń ardagerleri Jeńis kúnine orai 15 million sým nemese shamamen 1350 dollar alady. RIA Novosti málimetinshe, respýblikada UOS-nyń 500-ge jýyq qatysýshysy jáne eńbek maidanynyń 10 myńǵa jýyq qyzmetkeri turady, olar da járdemaqy alady.
Ázirbaijan
Ázirbaijan prezidenti Ilham Áliev biyl 1941-1945 jyldardaǵy Ekinshi dúniejúzilik soǵysqa qatysýshylarǵa 1500 manat materialdyq kómek tóleýdi tapsyrdy. Bul 882 dollardan asady.
Sonymen qatar, Ekinshi dúniejúzilik soǵysta qaza tapqan nemese keiin qaitys bolǵan jaýyngerlerdiń jesirlerine, sol kezdegi tyldaǵy qajyrly eńbegi úshin ordender men medaldarmen marapattalǵan adamdarǵa 750 manat tólenedi.
2021 jylǵy málimetter boiynsha, Ázirbaijanda 181 UOS ardageri bar.
Qyrǵyzstan
24.kg málimetinshe, Qyrǵyzstandaǵy Uly Otan soǵysynyń ardagerleri Jeńis kúnine orai 100 myń som alady, bul - qazirgi baǵam boiynsha 1218 dollar.
Mundai tólemderdi Ekinshi dúniejúzilik soǵys kezeńinde fashister men olardyń odaqtastary qurǵan kontslagerlerde, gettolarda jáne basqa da oryndarda bolǵan UOS qatysýshylary, múgedekteri, burynǵy kámeletke tolmaǵan tutqyndary, qorshaýda qalǵan kezeńde Leningrad kásiporyndarynda, mekemeleri men uiymdarynda jumys istegen jáne "Leningradty qorǵaǵany úshin" medalimen nagradtalǵan adamdar, sondai-aq, "Leningrad qorshaýynyń turǵyny" belgisimen nagradtalǵan adamdar alady.
Qyrǵyzstanda 107 UOS ardageri turady.
Tájikstan
Fergana agenttiginiń aqparatyna sáikes, Tájikstanda da tólem mólsheri ár aimaqqa bailanysty bolady. Mysaly, Dýshanbede Uly Otan soǵysynyń ardagerleri 3000 somoniden, iaǵni 240 dollardan, tyl eńbekkerleri, Aýǵanstandaǵy soǵysqa qatysýshylar, Chernobyl apatynyń múgedekteri jáne konstitýtsiialyq qurylysty qorǵap, asyraýshylary qaitys bolǵan otbasylar 800 somoniden, iaǵni 64 dollardan alady. Soǵdy oblysynda Uly Otan soǵysynyń qatysýshylary men múgedekteri, tylda jumys istegen adamdar, sondai-aq, qamqorshysyz qalǵan áskeri qyzmetshilerdiń jubailary 6000 somoni nemese 480 dollar alady.
Asia-Plus málimetteri boiynsha, Tájikstanda Uly Otan soǵysyna qatysqan 59 ardager qaldy.
