Búgin QR Premer-ministriniń orynbasary Jeńis Qasymbek jumys saparymen Arys qalasyna keldi, dep habarlaidy Túrkistan oblysy ákiminiń baspasóz qyzmeti.
Aldymen vitse-premer Atyraý oblysyna qarasty №1 sektordaǵy qurylys-jóndeý jumystarymen tanysty. Ol aýmaqta 482 úi ornalasqan. Zaqymdanǵan 431 úidiń qazirgi tańda 3-eýi tolyq jóndelgen. Al «BI Group» kompaniiasy osy sektordaǵy 88 úidi qalpyna keltirý jumystaryn qolǵa alyp otyr. Jumysshy top keiin Nur-Sultan qalasyna qarasty №9 sektorǵa aialdady. Onda 655 úi bar. Aýmaqta jóndelýge tiis 572 baspananyń 105-inde qurylys tolyǵymen aiaqtalǵan.
Sonymen qatar, Úkimet basshysynyń orynbasary 1904 jyly irgetasy qalanǵan «Arys-1» temirjol vokzalyna da aialdady. Mundaǵy jumys «Samruk-Kazyna Construction» AQ tiesili. Basqarma tóraǵasynyń birinshi orynbasary Arman Jetpisbaev mindettelgen sharýa tolyǵymen ýaqytyly atqarylyp jatqanyn málimdedi.
Keiin top Shymkent qalasyna qarasty 10-sektorda boldy. Onda esep boiynsha 652 úi tirkelgen. Jóndeýdi qajet etetin 604 úidiń 138-inde búginde jumys tolyq aiaqtalǵan.
Budan keiin jumysshy top qalalyq emhana men ortalyq stadiondaǵy jóndeý jumystaryna kóńil aýdardy. Issapar aiasynda Nur-Sultan, Aqmola, Qostanai qalalaryna tapsyrylǵan sektorlardaǵy jumystar nazarǵa alyndy.
Arys qalasynyń búgingi jai-kúiimen tanysqan Jeńis Qasymbek sapar sońynda shahardy qalpyna keltirý boiynsha qurylys-jóndeý jumystarynyń qarqynyn údetýdi tapsyrdy.
