22 qazan kúni Investitsiialar jáne damý ministri Jeńis Qasymbek Aqtóbe óńirindegi ónerkásiptik kásiporyndardyń basshylyǵymen jáne eńbek ujymdarymen birqatar kezdesýler ótkizdi.
Taý-ken kompaniialarynyń ujymdarymen kezdesýdi ashqan oblys ákimi Berdibek Saparbaev óńirdegi ónerkásiptiń damýy jaiynda baiandady. Toǵyz aidyń qorytyndysy boiynsha ekonomikanyń atalmysh salasy 5,7% ósken, 1,3 trillion teńgeden astam somaǵa ónim óndirildi. Qoldanystaǵy kásiporyndardyń oń dinamikasy jańa óndiris, júkteme, jańǵyrý jáne tsifrlandyrý esebinen qamtamasyz etilgen.
«Basty mindet – ekonomika ósiminiń qarqynyn 5 paiyzdyq deńgeide qamtamasyz etý. Boljamdarǵa sáikes, jyl sońyna deiin Elbasynyń bul tapsyrmasy oryndalatyn bolady. Áleýmettik damý – Prezident saiasatynyń negizgi basymdyqtarynyń biri, bul sońǵy kezekti Joldaýda taǵy da dálel. Elbasy tapsyrmasymen 2019 jylǵy 1 qańtardan bastap eń tómengi eńbekaqyny 1,5 ese – 28 myńnan 42 myńǵa kóterý josparlanýda. Aqtóbe oblysynda 35 myń adamnyń eńbekaqysy ósedi. Ýchaskelik dárigerler men medbikelerge ústemeaqy qosylyp, tárbieshiler men balabaqsha qyzmetkerleriniń, memlekettik qyzmetkerlerdiń eńbekaqysy ósedi dep kútilýde,-dedi Berdibek Saparbaev.
«Memleket basshysy Joldaýynda Úkimet aldyna birqatar mindetter qoidy. Negizgi maqsat – barsha qazaqstandyqtyń ómir súrý sapasyn jaqsartý. Bizdiń ministrlik kópjosparly jáne bizge úsh bazalyq memlekettik baǵdarlamalar – indýstrialandyrý, turǵyn úi qurylysy, infraqurylymdy júzege asyrýǵa naqty tapsyrmalar berildi, - dedi Jeńis Qasymbek.
Onyń sózinshe, byltyr Qazaqstan boiynsha turǵyn úidi paidalanýǵa berý kólemi 11 mln sharshy metrden asyp, 100 myńnan asa otbasy jańa baspanaly boldy. Biyl elimizde 12 mln sharshy metrge jýyq turǵyn úi paidalanýǵa berilmek, bul Qaraǵandynyń nemese Pavlodardyń turǵyn úi qoryna teń, iaǵni Qazaqstan jyl saiyn bir úlken qala salady.
«Aqtóbe oblysy turǵyn úi qurylysynyń kólemi jaǵynan qashanda kóshbasshylar bestiginde. Sondyqtan ministrlik oblys ákimdiginiń barlyq bastamalaryn qoldaýǵa ázir. Biz kelesi jyly oblysta qurylys kólemin arttyra alatynymyzdy kórip turmyz. Óitkeni turǵyn úi baǵdarlamalaryna biz bólgen árbir teńge qurylystyń naqty kólemin tabady jáne naqty azamat óz jaǵdaiyn jaqsartady»,-dep atap ótti ministr.
Ol indýstrialyq damý jaiynda aita kele qazirgi tańda ónerkásipti qoldaý jáne damytý boiynsha qabyldanyp jatqan sharalardyń óńdelgen eksport kólemin 2022 jylǵa qarai 1,5 ese, eksporttaýshy kásiporyndar sanyn 300-den 450-ge deiin ulǵaitýǵa múmkindik beretinin atap ótti.
«Aqtóbe oblysy Qazaqstannyń neǵurlym damyǵan indýstrialyq oblystarynyń biri bolyp tabylady. Máselen ónimdi eksporttaý jaǵynan Qazaqstan boiynsha ekinshi orynda. Dúnie júzindegi jaǵdai ózgeredi. Sondyqtan, biz eksportqa baǵdarlanǵankásiporyndarǵa qoldai qoldaý kórsetý tártibine kóshemiz. Memleket basshysynyń tapsyrmasymen eksportqa baǵdarlanǵan kásiporyndarǵa 500 mlrd teńge bólinýde. Onyń ishinde 100 mlrd teńge «Damý» quraldary arqyly shaǵyn jáne orta biznesti qoldaýǵa ketedi. Qalǵany Qazaqstannyń damý banki arqyly. Óz tarapymnan, ministrlik Prezidenttiń el azamattarynyń ál-aýqatyn arttyrý boiynsha qoiǵan barlyq tapsyrmalaryn júzege asyrý úshin barynsha kúsh jumsaitynyna sendirgim keledi,-dedi sózin túiindegen ministr.
Jeńis Qasymbek jumys sapary aiasynda sondai-aq, qurylys kompaniialarynyń ujymdarymen jáne Hromtaý qalasyndaǵy «Voshod - ORIEL» JShS ujymymen kezdesti.
Ol budan basqa, joldardy salý jáne qaita salý boiynsha iri jobalardyń, «7-20-25» jáne «Nurly jer» memlekettik baǵdarlamalarynyń júzege asyrylýymen, A synypty kóliktik-logistikalyq ortalyqtyń qurylysymen tanysyp, Muz saraiy men tennis ortalyǵynda boldy.
