Jeńildetilgen avtonesieleý baǵdarlamasynyń keibir sharttary ózgerdi. Bul týraly QR Premer-Ministriniń birinshi orynbasary Roman Skliar aityp berdi, dep habarlaidy QazAqparat.
«Ótken aptada biz Úkimettiń jeńildetilgen nesie berý týraly qaýlysyn qabyldadyq. Apta sońyna deiin «Báiterek» birqatar memlekettik organdarmen birlesip, bul jumysty aiaqtaidy», - dedi Roman Skliar Úkimet otyrysynan keiin tilshilerge bergen suhbatynda.
Premerdiń orynbasary jeńildetilgen avtonesie alý úshin qazaqstandyqtar qaida júginýi kerek degen suraqqa jaýap berdi.
«Bári burynǵydai qalady. Dál osy baǵdarlama jai ǵana uzartylady jáne keibir sharttary ózgerdi. Mysaly, bastapqy jarnany alyp tastadyq, somasy ulǵaidy», - dep túsindirdi R. Skliar.
Onyń aitýynsha, jeńildetilgen avtonesieleý baǵdarlamasyna qyzyǵýshylyq tanytatyndar kóp, al egjei-tegjeiin «Báiterek» holdinginen anyqtaýǵa bolady.
Sonymen birge spiker eldegi avtokólik tapshylyǵy týraly suraqqa jaýap berdi.
«Bul álem elderinde bolyp otyrǵan jaǵdai. Kólikke qajetti chipter jetispeýshiligi bar. Óndiris azaiyp, avtomobilderge suranys artty. Biz bul máselede jalǵyz emespiz. Bul jaǵdai bizdiń elde ǵana bolǵan joq», - dedi Roman Skliar.
Aita keteiik, QR Indýstriia jáne infraqurylymdyq damý ministrligi Ekologiia, geologiia jáne tabiǵi resýrstar ministrligimen birlesip, «Jasyl Damý» AQ qarajaty esebinen Qazaqstannyń azamattaryna jeńildetilgen avtonesie berý jáne avtobýs parkin jańartý boiynsha baǵdarlama ázirledi. Qaryz alýshyǵa 2 jyldyń ishinde bir retten artyq avtonesie alýǵa tyiym salatyn shekteý bar.
Aldyn ala boljam boiynsha, biyl jeńildetilgen avtonesiemen 15-17 myń adam kólik satyp alady.
