Nur-Sultan-Qaraǵandy tas jolynda jeńil avtokólikpen soqtyǵysqan brondy tasymaldaýshy tehnika Qorǵanys ministrligine tiesili emes. Vedomstvonyń baspasóz qyzmeti osyndai habar taratty, dep habarlaidy "Ult aqparat".
Buǵan deiin Nur-Sultan qalasynyń Politsiia departamenti bergen túsinikteme boiynsha, oqiǵa 1 qyrkúiekte bolǵan. Saǵat 07.35-te «Nissan Almera» markaly avtokóligin tizgindegen 46 jastaǵy júrgizýshi «Nur-Sultan-Qaraǵandy» tasjolymen Armandastar kóshesiniń qiylysynda solǵa burylǵan kezde dabyl shamdary iske qosylǵan jáne arnaiy dybys signaly bar patrýldik avtokólikke ilesip kele jatqan «BTR 82-A» kóligine jol bermei, saldarynan ekeýi soqtyǵysqan.
«Jol-kólik oqiǵasy saldarynan zardap shekkender joq. «Nissan Almera» avtokóliginiń júrgizýshisine qatysty Ákimshilik quqyq buzý týraly kodekstiń 610-babynyń 1-bóligi boiynsha ákimshilik is qozǵaldy. Material Nur-Sultan qalasyndaǵy mamandandyrylǵan aýdanaralyq sotyna joldandy. Politsiia departamenti dabyl shamdary iske qosylǵan jáne arnaiy dybystyq signaly bar kólik quraldary jaqyndaǵan kezde ózge kólikter jol berý kerektigin eskertedi», - dep jazady departamenttiń baspasóz qyzmeti.
Ázirge apatqa túsken brondy tasymaldaýshy tehnikanyń qai vedomstvoǵa tiesili ekeni belgisiz. Qorǵanys ministrligi onyń Qarýly Kúshterdiń bazasynda tirkelmegenin málim etti.
«Nur-Sultan qalasynda «Nissan Almera» avtokóligi men BTR-dyń soqtyǵysýyna qatysty BAQ-qa jáne áleýmettik jelige taralǵan aqparatqa bailanysty Qorǵanys ministrligi jol-kólik oqiǵasyna túsken brondy transporterdiń Qarýly Kúshterge tiesili emestigin habarlaidy», - delingen ministrltiktiń málimetinde.
