Qyzylordada "Daewoo Nexia" avtokóligi Syrdariiaǵa túsip ketti. Júrgizýshiniń janynda taǵy bir adam bolǵan, dep habarlady Sputnik Qazaqstan tilshisi.
Oqiǵa Qyzylorda qalasynda boldy. Oblystyq tótenshe jaǵdailar departamentine túngi saǵat 03:54 shamasynda "Daewoo Nexia" avtokóligi Syrdariiaǵa túsip ketkeni týraly habarlama túsken.
Qyzylorda oblysy tótenshe jaǵdailar departamentiniń mamandary kólikte eki adam bolǵanyn, bireýi sýdan júzip shyqqanyn jetkizdi.
"Kóliktiń ishinde eki adam bolǵan. Onyń bireýi – 1994 jylǵy azamat óz kúshimen jaǵaǵa shyqqan. Sol jastaǵy taǵy bir azamat kóliktiń ishinde qalyp qoiǵan. Oqiǵa ornyna jedel-qutqarý jasaǵynan 1 tehnika men 5 adam bardy", – dep málim etti tótenshe jaǵdailar departamenti órt sóndirý jáne avariialyq-qutqarý jumystary qyzmetiniń baspasóz hatshysy Áliia Erejepova.
Tótenshe jaǵdailar departamentiniń qyzmetkerleri kólikti sýdan shyǵaryp, 1994 jyly týǵan júrgizýshiniń denesin týystaryna tapsyrǵan.
