27 qyrkúiek kúni Katar astanasy Dohada jeńil atletikadan álem chempionaty bastalady. Dodaǵa Qazaqstan atynan segiz sportshy qatysady, dep habarlaidy "Ult aqparat" olympic.kz saityna silteme jasap.
Dohadaǵy álem birinshiligine Olga Rypakova (úsh qarǵyp sekirý), Olga Safronova (100, 200 metr, estafeta), Georgii Sheiko (sporttyq júris), Svetlana Golendova (estafeta), Elina Mihina (estafeta), Rima Kashafýtdinova (estafeta), Mihail Litvin (400 metr), Ivan Ivanov (iadro laqtyrý) qatysady.
«6 qyrkúiekke deiin ótkizilgen jarystardan soń segiz sportshy álem birinshiligine qatysý múmkindigine ie boldy. Biylǵy maýsym jaqsy qarqynmen ótti. Bizdiń sportshylar álem chempionatyn qabyldaityn stadionda baq synap kórdi. Aziia birinshiligi Dohada ótken bolatyn. Búginde komanda músheleri oqý-jattyǵý jiyndaryn ótkizý úshin Antaliiaǵa ketti (Túrkiia). Jiyndy ótkizý aimaǵy klimattyq jaǵdailarǵa bailanysty óte mańyzdy sanalady. Birinshi kezeńdi biz Ystyqkólde (Qyrǵyzstan) ótkizdik. Túrkiiada sintetikalyq jabdyq ústinde daiyndalamyz. Bizdiń atlettermen birge gollandiialyq maman Henk Kraaienhof jumys isteýde. Ol eki aidan beri sportshylarymyzǵa keńes berip keledi. Olimpiada qarsańynda ótkeli otyrǵan álem chempionatynda atletterimiz jaqsy nátije kórsetýge tyrysý kerek», - deidi bas bapker Erlan Ibraiym.
