Qazaqstan Prezidenti Nursultan Nazarbaev eldegi áigili jemqorlyq oqiǵalar jóninde pikir bildirdi, dep habarlaidy "Ult aqparat".
«Álem boiynsha jemqorlyqty túbegeili jeńgen adam joq. Biraq, bizdiń tabandylyqpen kúresip jatqanymyz barshaǵa aian. Byltyr jáne biyl 1129 memlekettik qyzmetshi jaýapkershilikke tartyldy. Olardyń ishinde daýly ister de bar. Burynǵy Premer-Ministr, keiinirek qorǵanys ministri qylmystyq jaýapkershilikke tartyldy. «Astana EKSPO-2017» prezidenti EKSPO-2017 qurylysyn 800 milliard teńgege josparlady. Ahmetjan Esimov kelip, shyǵyndardy 400 milliardqa qysqartty. Pavlodar, Atyraý, Qaraǵandy oblystarynyń burynǵy ákimderi, ministr orynbasarlary, sheneýnikter bar. Farmatsiiamen ainalysqandar da jazaǵa tartyldy", - dedi Nazarbaev jetekshi BAQ ókilderine bergen suhbatynda.
Prezident jemqorlyq úshin jaýapkershilikten eshkimniń qashyp qutyla almaitynyn basa aitty.
«Ministrlerdi de túrmege otyrǵyzamyz. Munyń qai jeri jaqsy? Al adamdy osy deńgeige deiin ósirýge qansha ýaqyt ketedi? Anda aýystyrý, munda qoiý, baqylaý, kómektesý, qoldaý bildirý - únemi osylai shyǵady. Sol sebepti, jemqorlyqpen kúresti júrgizip kelemiz jáne ony toqtatpaimyz. Kerisinshe, úlken kúsh-jigermen qarsy turamyz. Biraq, bizdiń azamattarymyzdyń ózi para beredi. Bul - jalpyhalyqtyq is, para berýdiń qajeti joq, sonda ony alatyn da eshkim bolmaidy", - dedi Prezident.
Eske sala ketsek, búgin Prezident Nursultan Nazarbaevtyń elimizdegi jetekshi BAQ ókilderine bergen suhbaty kórsetildi.
Onda Elbasy qazaq qoǵamyndaǵy eleýli ózgerister men ózekti máseleler týraly jýrnalister suraǵyna jaýap berip, 2017 jyldy qorytyndylady.
